Shillong, Jymmang, 30: Arngut ki briew ki la duhei ïa la ka jong ka jingim katba lai ngut kiwei pat ki la mynsaw jur ha ka jingther jong u lapbah uba jur ha ka sngi Thohdieng.
U Myntri Rangbah ka Jylla Conrad K. Sangma u la bthah ïa baroh ki bor ba dei peit bad ïa ki tnat treikam ka Sorkar ban long kiba peitngor bad ban shim ïa ki lad ki lynti ba kongsan ban ïada ïa ka jingim jong ki briew na ka jingwan lynshop ki bor ka mariang.
Ka Kong Klosliya Kharkongor (50 snem) na ka shnong Lumkyntung kaba hap hapoh ka Laitkroh-Khatarshnong Block
ka la duhei ka jingim na ka daw ka jingtwa khyndew katba u Bah Samborlang Tariang (35 snem) na Mawbynna, Pomlakrai u la duhei ïa ka jingim na ka jingngam jyllop.
Ka Sorkar ka la bthah ïa ka Deputy Commissioner ban pyllait ïa ka pisa jingïarap kaba T.4 lak marwei sha ki bahaing hasem jong ki arngut kiba la khladnoh.
Palat 1023 ngut ki briew ki la shah ktah ha ki 25 tylli ki shnong nalor 12 tylli ki iing bad 25 tylli ki iing skul ki la julor na ka jingther shaba palat u lapbah.
Halor ka jingsniew shaba palat jong ka mariang bad ka jingther jong u lapbah uba jur ha ka jylla, u Myntri Rangbah u la pynlong ïa ka jingïalang pyrkhat kam bad baroh ki Deputy Commissioner jong ki district ka jylla ha ka sngi Thohdieng.
U Commissioner & Secretary ka tnat Revenue & Disaster Management u Sanjay Goyal u la pyntip ha u Myntri Rangbah ïa ka jinglong jingman hapoh ka jylla ha kaba ïadei bad ka jingpynkhreh ban shim ïa ki lad jingïada da ki District bapher bapher ha kaba dei bad ka jinglum jingkheiñ ïa ki jinglynshop ki bor ka mariang.
Ha ka jingïalang pyrkhat kam, ki district ki la pyntip ïa ki jingjia twa khyndew, ka jingshlei um, ka jingsahkut ka um, ka jingkhyllem ki dieng, ka jingjulor ki jingtei bad ka jingjulor ki sainar elektrik.
Ka Regional Office jong ka IMD ka la pyntip ba ka jingsniew jong ka jinglong jingman ka mariang kan dang ïai bteng wat haduh ka 31tarik, Jymmang, 2025.
Ka State Disaster Management Authority (SDMA) bad ki District Disaster Management Authorities (DDMA) ki la peitngor bha ïa ka jinglong jingman jong ka mariang bad la bthah ruh ïa ki tnat treikam ba kin long kiba la pynkhreh lypa.
La kyntu ïa ki paidbah ba kin peit ïa ki jingpyntip ba la sam paidbah khnang ba kin dup lah ban pynkhreh bad ban shim ïa ki lad jingïada ha ka por kaba biang.
