Shillong, Nailar, 16: Ar tylli ki thuk thuk ar shaka ki la pra phum ha ka jingïatynrah markhmat ha ka 15 tarik, Nailar, 2025 ha ka por 8.50 baje ha ka shnong Khapmara, Bhoirymbong, Ri Bhoi Distirct. Ha kane ka jingjia, arngut ki samla ki la khladnoh hashen katba ar ngut kiwei pat ki la mynsaw jur.
Ka khubor ba la ïohlum ka la ïathuh ba kane ka jingjia aksiden ka la jia hapdeng kawei ka Scooty ka bym pat don ïa u Number Plate kaba la ñiah da u samla Martynshain¨ Myrthong uba la 20 snem rta ba la shong lang bad ki ar ngut ki samla kynthei kiba la tip kyrteng kum ka Ibaphylla Matlang, kaba la 19 snem ka rta bad ka samla Pdianghun Pathaw kaba la 19 snem ka rta na ka shnong Nongladaw katba ki dang wan na ka shnong Umroi Nongrah hynrei ynda poi ha Khapmara, Bhoirymbong ka Scooty ka la ïatyngkhuh bad kawei ka motorbike kaba don ïa u number ML05M 3295 kaba la ñiah da u samla Nangskhem Lyngdoh uba la 18 snem ka rta.
Ki arngut ki nongñiah jong kine ki thuk thuk ar shaka ki la khladnoh ha shen katba arngut ar ngut ki samla kynthei kiba shong ha ka scooty ki la mynsaw jur ha kaba la pynkit noh ïa ki sha Bhoirymbong CHC ban ïoh ka jingsumar hynrei namar ka jingjur shaba palat ka jingmynsaw la pynkit noh ïa ki sha Shillong Civil Hospital ban ïoh ka jingsumar kaba kham paka.
Ha kaba ïadei bad kane ka jingjia, ki Pulit jong ka Khapmara PIC ki la pynlong ïa ka jingtohkit bad ban tan noh ïa ki thuk thuk ar shaka kiba la julor sha thanat.
