Shilong, Ïaïong, 29: Uwei u rangbah ba la tip kyrteng kum u Nabin Singh, 41 snem ka rta u la duh noh ïa la ka jingim hadien ba u la hap kynsan na kawei ka kali kaba ñiah sted ha ka jingkieng Flyover, Umïam.
Ki Pulit jong ka Ri Bhoi District ki la pyntip ba kane ka la jia ha ka por 2:35 baje noh phai sngi ha ka jingkieng Flyover kaba don ha Umïam ha kaba kawei ka Kali Suzuki Wagon R kaba don ïa u nombar ML 05-AC-5114 ba la ñiah da u Govinda Biswas na Assam ka la pynher sted bha bad ynda ba la poi ha jingkieng Flyover ha Umïam utei u rangbah u la hap kynsan na ka Kali bad hap shapoh ka jingkieng kat haduh ba u la duh syndon ïa la ka jingim.
Une u rangbah uba la duh noh ïa la ka jingim, ha kane ka jingjia ba sngewsih la tip kyrteng kum u Nabin Singh 41 snem na ka shnong Mukhla.
Na ka jingpynher sted ka kali ka la tyngkhuh ïa ka kynroh jong ka jingkieng Flyover.
La ïathuh ruh ba ki don arngut kiba shong hapoh ka kali kiba la tip kyrteng kum u Bijoy Singh uba dei u para jong uba la khladnoh bad u Baris Marboh na Puriang kiba la mynsaw jur.
ïa kiba la mynsaw la pynkit noh sha Civil Hospital Nongpoh ban ïoh jingsumar katba ïa u Nabin Singh la pynbna da ki doktor ba u la khladnoh shwa poi ha hospital.
Ïa ka kali la tan noh sha Umïam Police Station bad ka jingtohkit halor kane ka jingjia ka dang ïaid shakhmat.
