NShillong, Lber, 18: Ka jingjia sngewsih ka la jia ha ka janmiet Lah Sngi u Blei ha ka shnong Sahsniang-B, ha kaba iwei i heprit kynthei ba dang 4 snem rta i la khlad noh katba ka hymmen jong i kaba la 11 snem ka la lait im da ka said hadien ba ki thylliej ding ba shyrkhei ki la bamduh ïa ka ïing sah ka jong ki.
I heprit iba la khlad i dei iba la tip kyrteng kum i Elisha ïakai, katba ka hymmen kaba lait im ka dei kaba la tip kyrteng kum ka Glorify ïakai bad kine ki arngut ki dei ki khun jong u Bah Mewos Shadap bad ka Kong Itaima ïakai na ka shnong Sahsniang-B, West Jaintia Hills District.
U Bah Founder Syngkon uba dei u dkhot jong ka Executive committee jong ka Dorbar Shnong, ula ïathuh ba kane ka jingjia ka la jia ha ka por kumba 8.00 baje eiei mynmiet katba ka kmie ka dang don ha lynti naba wan iew.
Ha ka por kine kine ki khynnah ki don tang arngut bad ki la ïohthiah ka Glorify ka la ïohsngew ïa ka jingmeh ding bad ka la pyrshang katba lah ban kyrsiew ïa ka para, bad ban rah ïa ka para imat kam sngewlah shuh kumta ka la mih shabar iing bad pyrta jingïarap na ki paramarjan, la ïathuh u Bah Syngkon.
U la ong ba la suba ba ka jingpluh ka lah ban dei na ka jingmeh ding ha dpei.
Ki Pulit pynlip ding bad ki Pulit ka Raliang ruh ki la poi ha ka shnong sahsniang ban pynlip ïa ka ding kaba ladep bamduh ïa ka iing bad ïa ki jingdon jingem baroh.
