Shillong, Jymmang, 14: Kawei ka samla na ka jylla Meghalaya ïa kaba la tip kyrteng kum ka Abiel Sachiana Ch. Marak, 20 snem, na ka shnong Rengram, West Garo Hills District ka la ïap ha ka hostel ba ka sah ha ka jaka pule Nurse ha Regional Institute of Medical Sciences (RIMS) College of Nursing ha ka jylla Manipur ha kaba la kynnoh ba ka la phasi ïalade ha kamra ba ka sah.
Katkum ka khubor ba la ïoh la ïathuh ba kane ka samla ka dei kaba dang pule ïa ka 4th Semester.
Halor jingïap jong kane ka samla ka don ka jingsuba sniew bad ki Pulit ki dang pynlong ïa ka jingtohkit kaba bniah ban lap ïa ka daw tynrai bad ïa ki sakhi sabut kiba biang.
Ki Pulit ka Langphei Police Station ki la register case ïa kane ka jingjia bad kin sa pyndep ruh ïa ka Post Mortem.
Haduh mynta ki bor Pulit kim pat ai satia ïa ka jingtip kaba bniah na ka jingshem ha jingtohkit.
