Shillong, Jylliew, 23: Uwei u rangbah briew ïa uba la tip kyrteng kum u Bah Silbelius Kharbani, 59 snem ka rta u la khlad noh hadien ba la suba ba u la shah pynïap da kaba shah dung da ka wait ha uwei pat u briew uba la tip kyrteng kum u Pranding Nongkhar, 54 snem ka rta.
U kyrwoh ba la phah da u Superintendent of Police jong ka West Khasi Hills District u B.D Marak la ïathuh ba kane ka la jia ha ka janmiet sngi u Blei ha kawei na ki jaka ap masi ha kyntoit Mawkhlam kaba hap hapoh ka shnong Mawkhlam-Nongpyndeng.
La ong ruh ba kine ki ar ngut ki dei ruh ki shi kynum na ka shnong Mawkhlam Nongpyndeng bad la ong ba ka jingïania kaba jur ka la mih hadien ba kine ki ar ngut ki shi kynum ki la ïashoh khawiang.
U suba nongpynïap u la don mynta ha ka kti jong ki Pulit bad ka jingtohkit halor kane ka jingjia ka dang ïaid shakhmat.
Ha kaba ïadei bad kane ka jingjia na ka liang jong u nongthoh khubor u la ïoh ruh ban ïakren bad u Myntri ka shnong Mawkhlam-Nongpyndeng u Bah V. Sohlangpiaw.
