Shillong, Nailar, 05: Uwei u rangbah, uba dang iaid lynti hadien ba la wan phai na la ka kam, ia uba la tip kyrteng kum u Umma Shankhar Shah, 60 snem ka rta uba sah ha Upper Lachaumiere, Shillong u la mynsaw jur hadien ba u la shah tynrah nadien ha kawei ka Scooty kaba don ia u nombar ML05-AD 5367ba la niah da u samla uba dang 16 snem ka rta uba shong basah ha ka shnong Nongrah, Shillong.
Kane ka la jia hajan ka Yalana Hotel ha Laitumkhrah, Shillong ha ka por kumba 10.45 baje eiei mynmiet ka 4tarik, Nailar, 2025 bad u nongniah Scooty hadien ba u la tynrah ia u Umma Shankhar Shah u la leit tynrah pat sa ia kawei ka kali Alto 800 kaba don ia u number ML05 AE 9642.
Namarba la jur shaba palat ka jingmynsaw, la pynkit noh ia u Umma Shankhar Shah sha Super Care Hospital katba ia u samla uba ñiah Scooty la pynkit sha Civil Hospital, Shillong.
La ioh jingtip ruh ba u Umma Shankar Shah u la khladnoh na kane ka sla pyrthei ha ka por 9:30 baje mynstep mynta ka sngi Baar namarba la jur palat ka jingmynsaw na ki bynta jong ka jabieng.
