Shillong, K’lyngkot, 10: U Myntri Rangbah ka Jylla u Conrad K. Sangma ha ka sngi Saitjaiñ u la kyrpad ia ki paidbah ka rilum Garo ban pynneh ia ka shongsuk shongsain, hadien ba uwei u briew u la iap bad kiwei pat ki la mynsaw na ka jingshah thombor ha ki briew ki bym lah ban ithuh ha West Garo Hills District.
Ia une uba la khladnoh la ithuh kyrteng kum u Dilseng M Sangma uba dei u dkhot jong ka sengbhalang ACHIK.
Halor kane ka jingjia, u Myntri Rangbah ha u kyrwoh ba la phah sha ki lad pathai khubor, u la iathuh ba lai ngut ki briew ki la shah kem hadien ba ka la mih ka jingiapynibor hapdeng ki ar kynhun hajan ka shnong Rajabala.
Haba pynrem jur ia kane ka jingjia, u Myntri Rangbah u la ong ba ki Pulit ki la ioh kem ia ki lai ngut ki briew kiba donkti na ki jaka bapher bapher bad iathuh ruh ba ki Pulit ka West Garo Hills ki dang trei shitom ban thwet lut ia ki briew kiba donkti ha kane ka jingjia.
Ha kaba iadei bad kane, u District Magistrate jong ka West Garo Hills u la khot da ka jingialang ia ki kynhun bapher bapher ban thaw da ka Peace Committee na ka baynta ban pynneh ia ka shongsuk shongsain hapoh ka district.
Kum ban shu pyntip, ha ka shiteng sngi ka sngi Thohdieng, shi kynhun ki samla ki la leit shajan ka shnong Rajabala ban jurip ia kawei ka jaka tih maw beain. Hadien ba ka kynhun ka la wan phai ha ki katto katne ki kali, ki la shah pakhang lynti ha kawei pat ka kynhun. Hadien kata, ka la mih ka thma ktien kaba lam shaduh pud ka jingiamynsaw.
Ka kynhun ba nyngkong ka la ioh phet krad, katba arngut kiwei pat ki la shah thombor haduh ba kin da mynsaw jur. Ia ki arngut la pynkit noh sha hospital bad uwei na ki, u la khladnoh kham hadien katto katne por.
Kat haduh ba la pynmih ia kane ka khubor, ym pat lah satia ban tip ia ka daw tynrai halor kane ka jingjia.
U Superintendent of Police Abraham T Sangma u la ong ba ki Pulit ki dang pynlong ia ka jingtohkit halor kane ka jingjia bad u la kyrpad ia ki paidbah ba kin pynneh ia ka shongsuk shongsaiñ.
Ka Garo Students’ Union (GSU), Central Executive Committee, ka la pynrem jur ia kane ka jingjia kaba la dkhat jubor ia ka jingim u Dilseng. Ka seng ka la dawa ia ki bor Pulit ban kem bad ban pynshitom ia baroh kiba donkti.
