Shillong, Nailar, 02: Ki shipai BSF kiba ap pahara ha Umkiang, ha ka sngi Thohdieng kiba la ïoh jingtip halor ka jingjia ba donkam ïa ka jingïarap ba kyrkieh ha ka por kumba 1:30 baje noh sngi na ka Dr. Evergreen Khgongjoh jong ka PHC Umkiang mar mar ki la leit ban ai jingïarap ïa kawei ka longkmie ba armet ka Kong Priya Pyrtuh, 24 snem ka rta.
Khlem da pynslem, ki shipai BSF Meghalaya ka 172 Battalion ki la phah ïa ka kali Ambulance ryngkat bad kawei ka Nursing Assistant ban pynkit noh mar mar ïa ka Kong Pyrtuh sha Jowai Civil Hospital, khnang ba kan ïoh ïa ka jingsumar ha ka por kaba biang.
Ha ka 30 tarik, u bnai baladep, u Waheh Shnong jong ka shnong Hawai Bhoi u Bah Phumen Shadap u la leit kyrpad ïa ki shipai BSF jong ka 4th Battalion kiba ap pahara ha Border Out Post Muktapur ban ai jingarap ïa u Bah Sanjay Shadap, 45 snem ka rta uba don ïa ka jingpang prie snam (Hematemesis) uba donkam kyrkieh ïa ka jingïarap ban pynpoi sha ka hospital ha ka por kaba biang.
Ka jingpan jingïarap jong u Waheh Shnong na ki shipai BSF ka long namarba ka shnong Hawai Bhoi ka dei kaba don kham sha kyndong jong ka khappud ka West Jaiñtia Hills district nalor ba ka surok ruh ka long kaba khohruh kohram.
Mar mar ka tnat shipai BSF ka la pynbiang da ka kali Bolero Camper ban leit shaw ïa u Bah Sayjay Shadap ban pynkit sha BOP Muktapur bad nangne la pynkit pat da ka kali Ambulance jong ki shipai BSF sha NEIGRIHMS, Shillong ban ïoh ïa ka jingsumar kaba biang.
Da ka jingshimkhia biang por bad ka jingtrei shitom jong ki shipai BSF, la lah ban pynllait im ïa ka jingim jong u Bah Shadap uba dang don mynta hapdeng ka jingshah sumar ha NEIGRIHMS Hospital.
“Kane ka jingai jingïarap da ka tnat shipai BSF ka pyni ïa ka jingkut jingmut ban ïada ym tang ïa u pud u sam hynrei ban ïarap ruh ïa ki paidbah kiba shong basah ha ki shnong khapud ha ki jingjia ba donkam kyrkieh,” la ong u kyrwoh ba la phah da ka tnat shipai BSF.
