Shillong, Nailur, 20: U Symbud Myntri Rangbah ka Jylla uba khmat ïa ka tnat Pynroi Sor bad kiwei kiwei ki tnat u la ai jingïaroh ïa ka sienjam jong ka Deen Dayal Upadhyay Community and Skill Development Center (DDUCC), Wahïajer, kaba hap hapoh ka jingpeit jingkhmih jong ka skulbah NEHU kaba la pynkupbor ïa ki samla bad ïa ki kynthei lyngba ki jingai jinghikai pyntbit bapher bapher khnang ba kin dup lah ban ieng ha la ki jong ki kjat.
U la ai mynsiem ïa ki nongïashim bynta ba kin pynleit jingmut bad kin leit tista sha ka jingai jinghikai bad ha kajuh ka por u la kular ruh ba ka Sorkar kan ai jingkyrshan ha kaba ïadei bad ki tiar ki tiar na ka bynta ka jingmyntoi jong ka shlem ai jinghikai jong ka DDUCC.
U Pro-Vice-Chancellor jong ka skulbah NEHU u Prof. S. Umdor u la pynkynnmaw ïa ka thong bakongsan ha kaba ïadei bad ka rep ka riang kaba pynthikna ïa ka jingmyntoi ha ka jingpahuh ka bam ka dih, ka jinglah ban pynkha ïa ki lad aikam bad ka jingkyntiew ha ki shnong nongkyndong.
U la kyntu ïa ki nongïashim bynta ba kin pyndonkam hok ïa ka jinghikai kaba ki la ïoh bad ban wad ruh ïa ki skhim kiba la ai kyrpang da ka Sorkar ban pynïar ïa ka rep ka riang jong ki.
U Dr. F. R. Sumer bad u Bah S. Laloo ki la banjur ba ka jingpyndonkam ïa ka IIHR Technology kan pynkhlaiñ shuh shuh ïa ka rep ka riang ha rilum Jaiñtia.
Ïa ka jingai jinghikai na ka bynta ki nongrep ka rilum Jaiñtia la pynlong halor ka phang “Skill Enhancement for Horticultural Development” kaba la long ha ka sngi Saitjaiñ da ka jingïatreilang bad ka tnat Horticulture, NEHU, Tura Campus ba la bei jingïarap da ka ICAR–IIHR, Bengaluru.
Ki don haduh 250 ngut ki nongïashim bynta ba kynthup ïa ki nongrep, ki samla, ki nongtrei, ki nongshah khot sngewbha na kylleng kylleng.
Ha ka wat banyngkong, la lamkhmat ïa ka jingai jingkren da u Prof. C. P. Suresh ka Department of Horticulture, NEHU Tura Campus bad uba long ruh u Nodal Officer jong ka Capacity Building Programme bad ka Kong Risakaru Lyngdoh, Subject Matter Specialist in Agronomy, KVK Wahïajer.
La pynkut ïa kane ka prokram da ka jingsam ïa ki mar rep bad ki synbai ba la ai jingkyrshan da ka ICAR-IIHR, Bengaluru, sha ki nongïashim bynta, ha kaba kham bun ki dei ki nongrep kynthei.
Ha ka jingïalang la ïashim bynta lang da u Prof. S. K. Dixit, Registrar I/c, NEHU Shillong, u Dr. F. R. Sumer, Principal I/c, DDUCC, u Prof. H. Lamin, ka Prof. S.M Sungoh kaba long ka Principal I/c jong ka DDUCC, u Bah Sanwotki Laloo uba long u Waheh Shnong ka Wahïajer, u Bah Reformingson Lamare, MDC bad kiwei kiwei.
