Shillong, Naiwieng 03: Ka Shad Nongkrem kaba dei shi bynta jong ka jingleh niam jong ka Hima Khyrim, ka la nang kiew da ka jingiashim bynta shitrhem bha jong ki khun ki hajar ka Hima bad khamtam eh da ka jingwan tuid jong ki briew kiba nabar ka jylla ban sakhi ia kane ka lehniam kaba paw bha jong ka Hima, katba nang iaid ki sngi bad ki snem.
Ka jingpynlong ia kane ka jingshad kaba shisien shisnem ka long ban ai nguh ia u Blei Trai Kynrad ba Un theh ia ki jingkyrkhu na ka bynta ban bha ka rep ka riang bad ka jingkoit jingkhiah jong ki khun ki hajar jong ka Hima.
Ia kane ka Shad Nongkrem la sdang da ka jingshad noh kjat da ki Bakhraw jong ka Hima na ka iing Sad iing Sunon bad ynda ladep ki Bakhraw la bud pat sa ki khun Syiem jong ka Hima Khyrim ryngkat bad ki khun ki hajar jong ka Hima Khyrim.
Ki rang kynsai kiba iashim bynta ha kane ka jingshad ki da riam ki da kup ia ka spong ha ryngkat bad u Thuïa, u Paila, u Shanryndang, ka Jymphong, u Ryngkap bad u Symphiah ia uba ki kaweh ha ka shad mastieh.
Katba ki thei sotti kiba iashim bynta ha ka shad Ainguh ki da deng da ka Pangsngiat kaba la don lang bad u Lasubon uba long kum u kynja syntiew bad ia ki paila ha ryndang bad u kynjri Tabut rupa lem bad ki sai khyllong bad ki kpieng nalor kiwei pat.
Ka riam tynrai ka dei kaba la khring bad pynshoh biej bha ia ki nongwan jngohkai kynthup ïa kiba wan ban sakhi ha ka sien ba nyngkong ia kane ka lehniam jong ka Hima Khyrim.
Mynta u snem 2023, Nalor ki Khun Syiem, ki nongshad kiba la poi ban iashim bynta ha madan shad jong ka Hima Khyrim ki long 395 ngut, kata, 174 ngut ki thei sotti bad 121 ngut ki rangkynsai bad kine ki nongshad ki bud ryntih na ka sur ba la pynmih na ki jingtem jingput jong ki Duhalia.
Ia kane ka jingshad la pynkut noh ha ka por janmiet bad hadien kane la sdang pat sa ka jinglehniam jong ka Hima Khyrim hapoh ka iing Sad ia kaba ym shah iano iano ban rung ha kane ka jaka lehniam.
Hadien ba ladep, ki Lyngdoh bad ki Bakhraw Batri jong ka Hima ki la hiar sha madan shad ban leh ia ka niam ka rukom hashwa ban ot ia u blang ba la wanrah na ki Raid bapher bapher kiba hap hapoh u pud u sam jong ka Hima Khyrim, hynrei kaei kaba phylla ka long ba kynsan kynsan la wan mih ka kynja puit bad ka leit ban tur shajan jong ka ding kaba la buh hapdeng madan bad haba pyrshang bad tip ka dei kaei, ym shym la don ba lah ban jubab hynrei kiba ong ba ha ka lehniam kin don beit kiba wan paw kum ki khñniang ki lah ban dei ki Ryngkew bad ki Basa.
Ha kane ka sngi la sakhi ruh ia ki kynrem ki lyndan kiba la wan sakhi hi da la ki jong ki khmat ba kynthup ia u Symbud Myntri Rangbah ka jylla u Bah Prestone Tynsong, u Chief Secretary ka jylla u Bah Donald P. Wahlang, u Director General of Police (DGP) u Dr. Lajja Ram Bishnoi, u Chief Executive Member (CEM) ka KHADC u Bah Pyniaid Sing Syiem, u Dy. CEM Bah Pynshngaiñ N. Syiem nalor ki Executive Member ka KHADC.
Hashwa ba kane ka lehniam jong ka Hima Khyrim, u Syiem Khynnah u la pom ia ki Blang kiba la wanrah na ki Raid bapher bapher jong ka Hima Khyrim kiba la wanrah ha iing Sad kaba don ha ka shnong Smit.
Ha ka jingiakren bad ka Batesi Tv u Syiem ka Hima Khyrim u Dr. Balajied Sing Syiem u la ong ba ka jingpoi jong ki khun ki hajar jong ka Hima ban pyndap smam ia ka madan shad ka long ban pyndon burom ia ka Hima ba shisien shi snem ban ai ka nguh ka dem ha U Blei Trai Kynrad na ka bynta ban khyrku kyrdoh ia baroh.
