Shillong, Naiwieng, 12: Ka Shad Nongkrem kaba dei shi bynta jong ka lehniam ka Hima Khyrim ka la nang kiew da ka jingïashim bynta shitrhem jong ki khun ki hajar ka Hima bad khamtam eh da ka jingwan tuid jong ki briew kiba nabar ka jylla ban sakhi ïa kane ka jinglehniam kaba pawbha jong ka Hima, katba nang ïaid ki sngi bad ki snem.
Ka Shad Nongkrem ba la pynkut noh ha ka sngi Baar kum shi bynta ban ainguh ïa u Blei u Trai Kynrad na ka bynta ban bha ka rep ka riang bad ba Un theh ïa ki jingkyrkhu kyrdoh kyrhai ïa ki khun ki hajar jong ka Hima.
Ïa kane ka Shad Nongkrem la sdang da ka jingshad noh kjat jong ki Bakhraw ka Hima na ka Iing Sad bad la bud pat sa ki khun Syiem jong ka Hima Khyrim ha ryngkat ki khun ki hajar jong ka Hima Khyrim.
Ki rang kynsai kiba ïashim bynta ha kane ka Shad Nongkrem ha la ka riam tynrai u Khasi da ki spong ha ryngkat bad u Thuïa, u Paila, u shan ryndang, jainphong, ka ryngkap bad u symphiah ïa kaba ki kaweh ha ka shad.
Ki theisotti kiba ïashim bynta ha ka shad Ainguh ki deng da ka pangsngiat kaba la don lang bad u syntiew lasubon, ha ryngkat bad ki paila ha ryndang bad u kynjri tabah rupa lem bad ki sai khyllong, ki kpieng nalor kiwei kiwei pat.
Ka riam tynrai ka dei kaba la khring bad pynshoh biej bha ïa kiba bun spah ngut ki nongwan jngoh kai kynthup ïa kiba wan ban sakhi ha ka sien ba nyngkong ïa kane ka lehniam jong ka Hima Khyrim.
Ki nongshad kiba la poi ban ïashim bynta ha madan shad jong ka Hima Khyrim kim duna shuh ïa ka saw spah ngut ba kynthup ïa ki theisotti bad ki rangkynsai. Kine ki nongshad ki bud ryntih na ka sur ba la mih na ki nongtem nongput, ki Duhalia.
Ki khun Syiem ruh ki la ïashim bynta ha kane ka Shad Nongkrem ha ryngkat ka riam ka beit kaba ishongkun.
Ha kane ka sngi la sakhi ruh da ki kynrem ki lyndan kiba kynthup ïa u Lat ka jylla u Chandrashekhar H. Vijayashankar, u Symbud Myntri Rangbah ka jylla u Bah Sniawbhalang Dhar, u Myntri Sorkar Bah Paul Lyngdoh, u Chief Executive Member ka KHADC u Bah Pynïaid Sing Syiem, u Deputy Chief Executive Member u Bah Pynshngaiñ N. Syiem nalor ki Executive Member ka KHADC bad kiwei pat.
U Syiem ka Hima Khyrim, u Paiem Dr. Balajied Sing Syiem, u la ong ba ka jingwan jong ki khun ki hajar jong ka Hima ban pyndap smam ïa ka madan shad, ka long ban pyndon burom ïa ka Hima shisien shi snem ban ai ka nguh ka dem ha u Blei Trai Kynrad na ka bynta ban kyrku kyrdoh ïa baroh lang.
