Shillong, Lber, 03: Ka Drug Reduction Elimination and Action Mission (DREAM) lyngba u Mission Director Bah Francis Kharshiing, ha ka Lah Sngi u Blei ka la lum la lang ïa ki kmie ki kpa jong ki samla kiba la ngop ha ka jingkyrni dih drok ban ïa phylliew jingmut halor ka jingeh jong ki kmie ki kpa ryngkat ka jingïadonlang jong ki Counsellor ha ka jingïalang kaba la long ha Conference Hall jong ka ophis Social Welfare ha nongbah Shillong.
Haba kren sha ki lad pathai khubor u Bah Francis Kharshiing u ïathuh ba kane jingthmu ban ka long kum ka dak ban ai mynsien ïa ki kmie ki kpa ki ju shah peit ibeiñ ha ka imlang ka sahlang lada don ki khun kiba la ngop ha ka jingkyrni dih drok.
U Bah Kharshiing u la ong ruh ba ka Sorkar ka kwah ban pynduh pyndam ïa kane ka jingshah peitkhmat jong ki longiing longsem bad kito kiba la ngop ha u drok.
