Shillong, Lber, 24: Da kaba buh hakhmat ïa ka thong ban tehlakam ïa ki nongkhaii bad ïa ki nongdih drok ka Drug Reduction Elimination and Action Mission (DREAM) ha ka Lah Sngi u Blei ka la lum lang ïa ki dkhot jong ki Village Defence Party (VDP) ha ryngkat ka jingïatreilang bad ka tnad Pulit.
Ha ka jingïalang kaba la long long ha Conference Hall jong ka Directorate of Social Welfare, Lachumiere la ïathir ïatai ruh ba ka kamram jong ki VDP ka long ruh ban tynrong lem ïa ka jingkit ba khia jong ki shnong ki thaw ban ïakhun pyrshah ïa ki kam runar ruser.
Kumba 80 ngut ki nongïashim bynta na ki shnong/dong bapher-bapher bad ki VDP ki la ïamir jingmut halor ki buit treikam bad ki jingpyrshang ban ïatreilang na ka bynta ban weng ïa ki jingeh kiba ïadei bad u drok bad ban wanrah ïa ka jingshngaiñ ha ki shnong ki thaw.
Ki nongïashim bynta ki la ïatai, ïathir bad ai jingmut halor ki jingeh ba ki shem bad kumno ban wad lad, wad lynti ban tehlakam ïa u drok ha ki shnong ki thaw.
Ki jingïakren ki la pynpaw ïa ka jingdonkam jong ka jingïashim bynta lang jong ki paidbah, ka jingïatreilang bad ki bor pynjari aiñ, bad ki jingpynsngewthuh paidbah ha kaba ïaleh pyrshah ïa ka jingdih drok.
U Superintendent of Police ka East Khasi Hills Distrik Bah Vivek Syiem haba kren ha ka jingïalang u la ïaroh ïa ka jingpyrshang jong ki VDP bad ban pynkhlain ïa ka jingïatreilang kaba neh bad ki lad ki lynti kiba la shimkhia ban ïada ïa ki shnong ki thaw khamtam ha ka nongbah Shillong.
Ka jingïalang ka la ïathir ïatai nalor ka jingïakhun pyrshah ïa u drok bad ki kam runar ha Shillong, la rai ruh ban ïatreilang na ka bynta ka jingshngaiñ ha ka imlang sahlang.
Ha kane ka sngi, la ai jingpynshai ruh da u Mission Director jong ka DREAM u Bah Francis Kharshiing, u Honorary Adviser jong ka VDP, ki ophisar na ka tnat Social Welfare bad kiwei kiwei.
