Shillong, ïaïong, 26: Ka Deparment of Sociology jong ka K. L. Bajoria College, Shillong ha ka sngi Saitjaiñ ka la pynlong ïa ka jingïathir ïatai halor ka phang, “prostitution in India; perspective.”
Ki nongkren ha kane ka jingïathir ki pynpaw ba bun hi ki briew kim sngewtynnat ïa ka jingkhaii met ha India bad ka jingïathir ka long ruh ha ka liang ka aiñ, ka imlang sahlang, ka niam bad ka ïoh ka kot ha ka kam shongkha shongman, ki jingïakren ki la pynpaw ruh ïa ki jingeh kiba kyrpang kiba la ïakynduh ha ka jylla Meghalaya.
Ki nongkren ba kynthup ïa ka Enakshi Ganguly, ka Lalitha S.A. ka Kong Patricia Mukhim, Dr. Rashi Bhargava, Dr. Binayak Dutta, Sr. Bipul Das bad Bibhudutta Sahu ki la kren ruh halor ki phang kongsan kum ka hok longbriew manbriew bad ka seng ki nongtrei kam awria, ka koit ka khiah bad ka jingshngaiñ, ka jingktah jong ki lad digital bad kumjuh ruh ki jingkhaii briew.
Ha ka jingïarthir ïatai, ka khubor kaba la sawa ka long ïa ka jingdonkam ban don ka jingkylla na ki jingbishar kiba ïadei bad ka akor sha ka rukom treikam kaba pynshong nongrim ha ka hok longbriew manbriew. Ki nongkren ki la pynpaw ba la dei ban don da ka aiñ bad ki polisi kiba sngap lem ïa ki jingshem jong ki nongtrei kam awria, ban pynduh ïa ka jingshah kynnoh, bad ban buh hakhmat eh ïa ka burom bad ka jingshngaiñ ban ïa ki lad pynshitom.
Haba kren ha kaba pynkut ïa kane ka jingïalang, ki nongpynïaid ki la ban jur ba ka jingïakren ka dei tang ka jingsdang. “Ngi kyrmen ban bteng shuh shuh ïa ki jingïathir ïatai bad ban pynlong ïa ki jingkylla ha ka polisi kiba burom bad ïada ïa ka burom briew,” la ong u nongmihkhmat na ka K. L. Bajoria College.
Ïa kane ka sienjam jong ka kolej la ai jingïaroh kum ka mat ba donkam bha ban ïathir ïatai bha ha ka imlang sahlang ha kaba ki jingïakren shaphang ka kam khaii met bunsien ki sahkut tang ha ki saw kynroh jong ka jingkhang.
Uwei na ki nongïashim bynta u la kdew, “ka jingkylla kaba shisha ka sdang haba ngi nud ban kren shai, ban sngap jylliew bad ban leh da ka jingstad.”
