Shillong, Risaw, 08: Ka meiheh jong u heprit Kyrshanbor Kharmudai, 7 snem ka rta, ha kaba ïa ka met jong u la lap narud surok khlaw Mawpat ha ka step sngi Palei, ka la ïathuh ba kumno u la jah ha ka por ba ka dang khot ïa u ban dih sha sngi ha ka janmiet sngi Balang.
Ka Kong Trilin Kharmudai, ka Meiheh jong u heprit Kyrshanbor ka la ïathuh ba ka dang don ha ïing ban pynthiah ïa ki khun ba dang rit katba u heprit Kyrshanbor u la jahrngai najan ïingsah ha ka sngi Balang ha Lum Myrboh, Nongrah
Ka la kamba kam shym la ïohi hi ruh badno u leit ïalehkai. “Nga dang ai buiñ ïa i khun ba dang rit bad nga ïoh thiah. Ki ïalehkai phutbol hi shipara hynrei um shym leit ïalehkai lang bad ki. U la leit lehkai shabar, bad nga dang pyrkhat ba kam lei lei namarba u ju leit ïalehkai borabor shabar,” ka la ong.
Ka Kong Kharmudai shuh shuh ka la ïathuh ynda ka la kyndit naba ïoh thiah ka la khot ïa u heprit Kyrshanbor ban dih sha noh hynrei um shym la wan satia. Ka la ong ka la pyrshang ban leit wad kylleng ïa u, kynthup ruh sha ka ïingsah ki paramarjan bad sha Lapalang hynrei kam shym la lap satia ïa u.
Ka meiheh ka la ïathuh ba u heprit Kyrshanbor u dei uba dang pule ïa ka klas Nursery bad uba dei uba ju sngewtynnat ban ïalehkai marwei bad tang shu khot ban bamja ne dihsha mar mar u ju wan phai noh sha la ïing. Ka la ïathuh ba ka dang kynmaw ba u phong da ka sopti rong jyrngam bad hadien kata u la kylliang noh ban phong da ka sopti rong saw shwa ba un jah rngai.
Haba kylli, ka Kong Kharmudai ka la ong ba ki dei tang ki khynnah rit bad kam ju don kano kano ka jingïakajia badno badno ruh.
Ka Kmie jong u heprit Kyrshanbor ka la khladnoh naduh ar snem mynshwa, katba u kpa um shym la sah lang.
U SP ka East Khasi Hills Bah Vivek Syiem u la pynthikna ba u heprit u la shah pynïap bad ka jingtohkit ka dang ïaid shakhmat.
Ki Pulit kin sa thaw da ka Special Investigation Team (SIT) ban pynlong ïa ka jingtohkit kaba bniah khnang ban ïohkem ïa kiba donkti ha kane ka kam runar.
