Shillong, Naitung, 28: Ka Seng Samla Hima Lyngïong Pyllun baroh kawei ka la pynpaw ïa ka jingkyndit ban ïohi ba la pynïeng ïa ka Pandal kaba heh ha ka madan Phanniewlah Neng ha Hima Lyngïong, East Khasi Hills District.
Ka Seng Samla kaba la pynlong ïa ka jingtohkit bniah ka lalap ba ka dei ka Pandal kaba la shna na ka bynta ki nongïaid Yatra na ka niam Hindu kiba thmu ban ïaid Yatra ha ka 2 tarik u Nailar sha krem Mawjymbuiñ, Mawsynram.
Ka Seng Samla ka lap ruh ba la shna ïa kane ka Pandal khlem da ïoh jingbit na ka shnong lane na u Lyngdoh jong ka Hima Lyngïong marmar ki la leit ban pynsangeh ïa kane ka kam.
Ki nongïalam ka Seng Samla ki la ïathuh, haba ki leit kylli, ki nongïalam jong ka kynhun kaba pynïaid ïa kane ka Yatra ki la ong ba ki la pan jingbit da ka jingthoh hynrei kim pat ïoh jubab eiei haduh mynta ruh bad kane ka jingshna jong ki pat ka dei namarba la ai jingbit tang da ka ktien da u Rangbah Shnong.
Haba wad jingtip na u Rangbah Shnong u la kubur ba u shu ai jingbit tang da ka ktien hynrei ïa kane ka kam un sa shong jingïalang mynta ka janmiet bad u Lyngdoh ban ïakren pynbeit.
