Shillong, K’lyngkot, 04: Kawei ka ïing jong i Kong Berimai Marbañiang kaba don ha ka shnong Umlyngka Mishon, Upper Shillong ka la ingkhong khait bad kane ka la jia ha ka por 5:15 baje janmiet ha ka sngi U Blei.
Ha kane ka ïing ki don lai kynrad kiba sah wai bad ha kane ka sngi kim shym la don hapoh ka ing namarba ki don kiba dang leit shuti sha shnong bad ki don pat kiba dang mih ban leit thied jingthied sha dukan.
Donbok ba ha kane ka jingjia ym shym la don ba mynsaw hynrei ka īing ka la ingkhong lut bad ym shym la ioh sei wat tang iwei i tiar ruh.
Ki paidbah nongshong shnong tang shu iohi ia kane ka jingjia ki la wan ban mareh ban iarap pynlip ia ka ding bad da ka jingwan poi ki kali pynlip ding ka tnat Fire and Emergency Services (F&ES) la lah ban pynlip ia ki thylliej ding shwa ba ka ding kan pur sa sha kawei pat ka ïing kaba la buh ia u khaw reshon.
Haba kylli na u Rangbah Shnong, la iathuh ba dei na ka jingthud ka bording Electric namarba naduh ba dang shai ka bneng ka la don ka jingthud ha ki wiring hynrei ym shym la poi pyrkhat ba kan jia kumne kat haduh ba ka iing kan da ingkhong khait.
Ha kane ka jingjia la don lang ki nongialam Shnong naduh u Bah Stephen Lyngdoh, u Bah Trikilak Lakiang bad u Bah Leofast Majaw.
Kat haduh ba la thoh ia kane ka khubor ym pat lah lah satia ban ioh ia ka jingkheiñ ba thikna halor ki jingjulor ki mar ki mata bad ki jingdon jingem hapoh iing.
