Shillong, Nohprah, 02: Ha step jong ka sngi Saitjaiñ kawei ka kudam buh ata jong ka Magic Cook kaba don ha Garikhana ka la kylla dpei ha kaba ki thylliej ding barhem ki la bamduh ïa kane ka kudam baroh kawei. La antad ba ka jingjulor ka la kot da ki lak tyngka.
Kane ka kudam, kaba la long trai da ka longiing Bajoria, ka la kem ding ha ka por kumba 1:00 baje eiei mynstep bad la suba ka lah ban dei na ka jingthud jong ka bording elektrik.
Ka kynhun Pulit jong ka tnat Fire & Emergency Services, ka kynhun SDRF ki la wan poi ha kane ka jaka ban pynlim ïa ka ding khnang ban ïada na ka jingpur jong ka ding sah ki jaka kiba marjan.
Ha kane jingjia, kam shym la don kano kano ka jingjia kaba sngewsih.
Ka State Disaster Response Force (SDRF) tang shu ïoh jingtip halor kane ka jingjia, mar mar hapoh ka jingïalam jong u Commandant ka SDRF u Bah PH Khongsngi, bad u 2nd in-Command u Bah B. Sahkhar ki la leit sha kane ka jaka.
Katkum ka jingpyntip jong u Divisional Commandant of Home Guards, Shillong u Bah PH Shylla u la ïathuh ba ka SDRF ka la pynkut ïa ka jingklang jong ka ding kaba la neh haduh shiphew kynta da ka jingïatreilang bad kiwei pat ki tnat treikam ka Sorkar.
Ka jingpluh jong kane ka kudam buh ata, ka la wanrah ïa ka jingdheng kali kaba jur bha ha ka thaiñ Garikhana bad ïa ki kali kiba wan na ka thaiñ Mawlai la pynïaid lyngba ka surok Motphran.
U Sanjeeb Kumar Bajoria uba dei u trai jong kane ka karkhana ha ka jingïakren bad u nonglum khubor u la ïathuh ba u la ïoh jingtip ha ka por kumba 12:30 baje mynmiet katba u dang don sha Guwahati.
“(Tang shu ïoh jingtip nga la wan her marmar) bad nga poi hangne ha ka por 2:00 baje mynstep bad ïohi tang ïa ki briew kiba ïalum bad ïa ka jingklang jong ka ding hapoh ka kudam. Nga ïohi ïa ki kali pynlip ding bad ïa ki kynhun ai jingïarap kiba pyrshang ban pynlip ïa ka ding,” ula ong.
Katkum ka jingïathuh jong u Bajoria, kane ka kudam ka dei kaba la rim bad kaba shu shna da ki dieng bad ka jingjulor ruh ka dei kaba la bun bha.
Haba kylli, ula ïathuh ba hapoh kane ka kudam, la buh ïa u ata, moida, suji.
