Shillong, K’lyngkot, 30: Ka Samla Ibahundaris Kharsyiemlieh na ka shnong Marang Jaidoh, West Khasi Hills District, ka la wanrah nam ïa ka District bad ka Jylla baroh kawei lyngba ka jingïoh pdiang jong ka ïa ka kyrdan 1st Dan Black Belt ha ryngkat ka jingïoh khur takma ha ka lympung National Kickboxing.
Ka samla Ibahundaris kaba dei ka khun jong u Bah Phorest Khardum bad ka Kong Estina Kharsyiemlieh ka la long ka samla kynthei kaba nyngkong tam na kane ka Jylla Meghalaya ka ban ioh ia kane ka nam bad ka kyrdan ha kaba mynta ka la long ruh ka Master ne ka nonghikai ha ka Jylla hapoh ka All Meghalaya Kickboxing Association.
Ïa ka samla Ibahundaris la pynkup burom ha ka 30 tarik Kyllalyngkot, 2025 da ka All Meghalaya Kickboxing Association ha ka jingïalang kaba la long Mecofed Hall, New Nongstoiñ ha ryngkat ka jingïadonlang jong u Bah Samuel Hahshah uba long u President jong ka AMKA, ka District Sports Officer ka West Khasi Hills ka Kong Balarina Syiem kaba la long ruh kum ka Kongsan, u District Forest Officer ka West Khasi Hills, ki kmie ki kpa jong ka samla Ibahundaris, u Sordar Shnong ka shnong Marang Jaidoh bad kiwei kiwei.
Nalor ka jingpynkup burom ia ka samla Ibahundaris, ka AMKA ka la pynkup burom ia ki kmie ki kpa jong kane ka samla.
Ha kane ka sngi, la pyni ruh ia ka rukom ialehkai kickboxing da ki khynnah ialehkai jong ka AMKA kiba la ioh ruh ban khur ia ki khusnam bapher bapher ha ka lympung National Championships 2024-25.
