Shillong, K’lyngkot, 25: Ki nongïalam jong ka Khasi Students Union (KSU) kiba la ïoh ujor na ki paidbah, ha ka shiteng sngi jong ka sngi Saitjaiñ ki la buddien ïa ki briew ba la kynnoh ba ki dei ki snar nongkhaii drok kiba ju mlien ban die ïa u drok ha Them Bijoy manla ka sngi.
Ha ka jingïakren bad u nonglum khubor, u Assistant Organising Secretary jong ka KSU Seng Kmie u samla Cleanstar Shabong u la ïathuh ba ha ka jingap shrip, ki dkhot ka seng ki la ïoh bat haduh saw ngut ki briew kiba ju donkti ban khaii ïa u drok ïa kiba ka seng ka la lap ïa ki sakhi sabut na ka jingdon jong u drok ha ka met ka jong ki.
Nalor u drok, ha ka met jong kine ki nongkhaii drok, la sakhi ruh ba ki la thep ha pla ïa u Ganja bad ki thyrnia injekeshon.
Katba ki dkhot ka seng ki dang tohkit, uwei napdeng kine u la pyrshang ban phet krad da kaba rung sha them Iewmawlong bad hadien ka jingïakthong, ki dkhot ka KSU ki la ïoh bat biang ïa une uba phet.
Ïa kine ki saw ngut ki snar khaii drok ki dkhot ka KSU ki la leit ban aiti noh sha ki Pulit jong ka Sadar Police Station.
