Shillong, Jymmang 16: Kumba 3 tylli ki examination centre la buh ha nongbah Shillong na ka bynta ban pyniaid beit ïa ki kam ban pynlong ïa ka eksam Common University Entrance Test (CUET-UG) 2025.
Kine ki jaka thoh eksam ba thymmai ha Shillong ki dei ha St. Mary’s Higher Secondary School ki ban don kumba 70 computer node, Shillong College – 100 computer node bad Shillong ITI – 29 computer node, ïathuh u Commissioner & Secretary ba khmih ïa ka tnat Pule puthi ka sorkar u Vijay Kumar Mantri ha ka sngi Thohdieng.
“Ka sorkar jylla ka dang ïasyllok bad ka National Testing Agency (NTA) ban kyntiew ïa ka jingdon ki examination centre na ka bynta ka computer-based test. Na ka liang ka NTA ka la jubab ha kaba ïadei bad kane ka kam bad ki dang ïatreilang hajan bad ka sorkar jylla ha kaba ïadei bad kane ka kam,” u la ong.
Katkum ka jingïathuh jong u, kine ki centre ki ai jaka ruh ïa ki samla pule kiba la ïoh ki jaka ïaleh eksam ha ki por kiba mynshwa bad la pynkhreh ruh ïa ki jaka thoh eksam ha ki jaka bapher bapher.
Katkum ka jingtip ba la ïoh lum na ka NTA, ki la don kumba 11,309 ngut ki samla ban ïakhun ïa ka eksam kaba dei ban sdang ha ka 19 tarik mynta u bnai. Na kine tang 1,376 ki kyrtong ki ïoh ki jaka ban ïaleh ïa ki eksam ha Guwahati; bad kiwei pat kiba dang sah mynta kin ïoh ïa ki centre ha Meghalaya.
“Kumba ka long mynta ki samla pule na Meghalaya kim donkam ban leit sha Guwahati na ka bynta ban ïakhun ïa ka eksam CUET (UG). Baroh kiba dei ban ïakhun ïa kane ka eksam kin hap ban ïakhun beit ha ki centre ha Shillong, Tura, ne Guwahati, kaba dei ban sdang naduh ka 19 tarik mynta u bnai. Ka jingpynkylla ïa ki centre la dep ban pyntip sha ki samla pule da ka NTA ne lyngba ka email ne ki message,” pyntip biang u Mantri.
Na ka liang ka sorkar jylla ka la shim khia bha ban ai lad ïa ki samla pule ka jylla ba kin ïoh beit ban ïakhun ïa ka eksam CUET.
