Shillong, Nailar, 21: Ka Hynniewtrep Youths’ Council (HYC) ka la thoh sha u Joint Labour Commissioner ka jylla ban dawa ba dei ban bud ryntih bad ban pyntreikam hok ïa ka aiñ Meghalaya Identification, Registration (Safety & Security) of Migrant Workers Act, 2020.
Ha ka shithi ba la phah ha ka sngi Palei, u President ka HYC u Bah Roy Kupar Synrem u la pynpaw ïa ka jingsngewkhia halor ki nongbylla kiba wan rung bad trei ha Meghalaya da kaba pyndonkam tang ïa ka “Acknowledgement Slip” ba la ai da ka tnad Labour, khlem da pynshisha bha ïa ki jinglong jong ki.
Katkum ka jingong jong u, ka HYC ka sngewkhia halor ka jingshna, soi thok, lane ka jingshim be-aiñ ïa ki “acknowledgement slip” bad ki “registration card” da ki nongbylla sngi ba la lap ha ka por ba la talasi khamtam ha ka thaiñ Byrnihat jong ka Ri Bhoi District.
“Ngim la satia ban sngewthuh kumno ba ïa kine ki briew la shah ban rung shapoh ka Jylla ne ban trei ha ki jaka bapher bapher tang da ka bor jong ka slip ba la kdew ba la pynmih da ka tnad Labour. Kane ka long ka bym lah ban pdiang namarba ïa ki jingjia ba mynshuwa jong kine ki briew ym pat lah ban pynshisha tad haduh ban da ai ïa ki Registration Card sha ki. Kum kine ki sienjam bad jingbthah kiba donkam dei ban ai sha baroh ki bor ba dei peit kynthup ïa ki Pulit ha ki khyrdop talasi ba kin ym shim ïa kum kine ki “Acknowledgement Slip” kum ki kot ki sla kiba biang ban ailad ïa ki nongbylla sngi ban rung sha ka Jylla lane ban trei ïa kano kano ka kam tad haduh ban da ai ïa ka Registration Card sha kum kita ki nongbylla,” ong u Bah Synrem.
Ka HYC ka la aiti ruh ïa ka kopi ïa ki kot pynrung kyrteng ba la shna/soi thok/ba la ïoh beaiñ. “Uwei u briew uba kyrteng u Bishal Sharma, la ai (kum kane ka Registration Card) da ka ‘Ophis jong u Registration Officer, East Jaiñtia Hills’ ha ka 01/02/2026 la lap da ki dkhot jong ngi ha ka 20 tarik, Nailar, 2025 katba ki dang pynlong ïa ka jingkhynra bad talasi ban ïada na ka jingwan rung ki briew kiba nabar ha Byrnihat Check Post.
“Kane ka pyni ba ki don lehse da ki hajar ngut ki nongbylla sngi kiba lah ban ym aplai lyngba ka rukom treikam kaba biang bad ki la rung be-aiñ sha ka Jylla kaba buh jingma pat ïa ka Jylla baroh kawei,” u la ong bad dawa ba dei ban shim ïa ki sienjam kiba donkam ban pynthikna ba ki nongbylla sngi kin rung shapoh Meghalaya katkum ka aiñ bad ban bud ïa ki kyndon bad dei ban shim ruh ïa ki sienjam kiba tyngeh pyrshah ïa ki riewshimet kiba shna ne die ïa ki kot ki sla ba shu soi thok.
