Shillong, Rymphang, 19: Ka jingïarap kaba stet hapoh ka jingthmu jong ka CM CONNECT ka la ïarap ïa ki nongshong shnong jong ka shnong Koraibari ban ïoh ïa u khaw reshon PDS katkum ka National Food Security Act (NFSA).
Ki nongshong shnong jong ka shnong Koraibari kaba hap ha ka thaiñ Ranikor ki la ujor sha u Myntri Rangbah ka Jylla u Conrad Sangma halor ka jingbym ïoh ïa u khaw reshon PDS ba ki ju ïoh manla u bnai katkum ka National Food Security Act (NFSA) na u nongdie reshon Fair Price Shop (FPS).
U Welwering R. Marak, uba dei u nongsam khaw reshon uba don hapdeng ka jingïakynad, la kynnoh ba u la kyntait ïa kawei ka kynhun ki nongïoh jingmyntoi ïa u khaw reshon uba dei hok u jong ki katkum ka rukom sam marbam paidbah. Mynshwa, ka jingmih ar kynhun hapoh ka shnong ka lam sha ka jingïapher jingmut kat haduh ba ki paidbah ki la shah pynduh ïa ka hok jong ki.
U Myntri Rangbah uba la leit jngoh ïa ka shnong Koraibari lai sngi mynshwa u la pynthikna ban leh da kaba tyngeh, khlem da kheiñ ïa ki jingdawa bad jingdawa pyrshah na ki kynhun shnong bapher bapher. U la ïakynduh ïa ki trai shnong ha Ranikor bad pynthikna ïa ki ban ïoh ïa ka hok.
Ka Director jong ka tnat Supply ka Kong Anita Kharpor mar mar ka la thoh sha u Deputy Commissioner jong ka South West Khasi Hills bad bthah ban pynlong ïa ka jingtohkit halor kane ka kam bad ban shim ïa ki sienjam ba tyngeh.
Ha ka 17 tarik mynta u bnai, ka kynhun tohkit na ka tnad Supply ka la hiar sha ka shnong shnong Koraibari ban pynlong ïa ka jingtohkit kaba bniah. Marmar la shimkhia hadien ba la pynthikna ba bun ki nongïoh jingmyntoi ki la shah pynduh ïa u khaw reshon haduh shisnem kynthih bad don ruh kiba la duh khaw ar snem.
Hadien kane, ïa ka laisen jong u nongsam saw reshon la pyndam syndon bad la hukum ïa u ban aiti ïa baroh ki kot ki sla kiba don bad u. Kumjuh ruh la pyrshang ban wanrah ïa ka jingïasuk hapdeng ki arliang mamla kiba ïaleh pyrshah ha ka shnong Koraibari ban pynthikna ïa ka jingpynbeit kaba hok na ka bynta baroh.
Shuh shuh, la bthah ïa u Deputy Commissioner jong ka South West Khasi Hills ba un sdang ïa ka jingpynshitom, kynthup ban ujor da ka ejahar pyrshah ïa u nongsam khaw reshon lada jia ba ïa u khaw ba la shah pynduh um sam lut sha baroh ki nongïoh jingmyntoi kiba dei hok.
“Ka CM Connect ka la pynkupbor ïa ki paidbah jong ngi. Mynta ki paidbah ki la sdang ban shlur bad ban ieng na ka bynta ka hok jong ki. Nga sngew ba ka don ka jingshngaiñ ba ki briew jong ngi mynta ki lah ban pynbeit ïa ka jingeh jong ki bad ka lad ban pynbeit ïa ka jingeh jong ki lyngba ka CM Connect”, la ong u Conrad K Sangma.
U la ong shuh shuh ba kum u riew saiñ pyrthei u la ïoh pdiang bunbah ki dorkhas bad ki jingkynmaw bapher bapher na ki paidbah hynrei ha ka jingtreikam kam long kaba lah ïa u ne ki paidbah ban pynpaw ïa ka jingsngewkhia jong ki. U la ong ba la shna ïa ka CM Connect ban ailad ïa ki nongshong shnong ban sngap bad ban weng ïa ki jingeh jong ki.
Haba kynthoh ïa kane ka jingjia, u Commissioner & Secretary ka tnad Food and Civil Supplies u Pravin Bakshi u la ong, “ka tnad marbam mardih ka la pyrshang katba lah ban pynthikna ïa ka jingkhuid jingsuba ha ka jingsam marbam khnang ba ym don ki nongïoh jingmyntoi kiba dei hok kin shah pynduh. Ka jingsam ïa u khaw lyngba ka ePOS ka dei ka sienjam kaba kongsan ban pynthikna ba ki nongïoh jingmyntoi kin ïoh ïa ka resit kaba la pynlong hi na ka bynta ka jingsam khaw jong ki. Ki jingpeit bniah man ka por ki dang ïaid”.
Ki nongshong shnong ki la ïaroh ïa ka jingshimkhia jong u Myntri Rangbah ka Jylla namarba u la jubab kloi ïa ki jingeh. “Ngi sngewnguh ïa u Myntri Rangbah uba la wan ïarap ha ka por kaba biang. Ngim lah ban ngeit ba tang hapoh ar sngi hadien ba la ujor ki ophisar ki la wan sha shnong jong ngi, ki la pynshisha ïa ka jingujor bad ki la weng noh mardor ïa ka laisen. Mynta ngi la ïoh ïa ka hok jong ngi”, la ong u Secretary jong ka shnong.
