Shillong, Nailar, 16: Katkum ka khubor na ki Pulit la pyntip ba ka Kong Judith L Pohlong ka la ujor sha ki Pulit ban pyntip ba ha ka 12 tarik, mynta u bnai ha ka por kumba 3.10 baje mynstep ki runar bym lah ban tip ki la prong tuh hapoh ka Departmental Store ha Donglum Surok, Block-I, Umpling, Shillong bad ïoh rong tuh ïa ka pisa T. 70,000 hajar.
U Banaliel Kharmalki u la ujor sha ki Pulit ban pynti ba ha ka 12 tarik mynta u bnai ha ka por kumba 7.10 baje mynmiet, ki runar ki bym lah ban tip ki la lute ïa ka tape na ka kali jong u kaba don ïa u nombar ML-05F-2115 ha ka shnong Mawkhlir, Sohryngkham, NH-6, East Khasi Hills District.
U Bah Kerrilang Kharhunai u la ujor sha ki Pulit ban pyntip ba ha ka miet 12 tarik, mynta u bnai ki runar bym lah ban tip ki la rong tuh ïa ka Motorcycle kaba don ïa u nombar ML-05AE-4270 na 4th Furlong, Shillong.
U Avinash Kumar Rai u la ujor sha ki Pulit ban pyntip ba ha ka miet 11 tarik mynta u bnai ki runar bym lah ban tip ki la rong tuh ïa ka motorcycle kaba don ïa u nombar ML-05V-6353 na Mawiong, Shillong.
U Sanjay Rajah u la ujor sha ki Pulit ban pyntip ba ha ka miet 11 tarik, mynta u bnai ki runar ki bym lah ban ithuh ki la rong tuh ïa ka Scooter jong u kaba don ïa u nombar ML-05AA-5266 na ka iing sah jong u ha Professor Colony, Kharmalki, Malki, Shillong.
U Shri Dilip Kumar Singh u la ujor sha ki Pulit ban pyntip ba ha ka 11 tarik, mynta u bnai ki runar bym lah ithuh ki la prong tuh hapoh ka ingsah jong u ha Lower New Colony, Shillong bad rong tuh ïa kawei ka TV set kaba shongdor kumba T. 15,000 bad ar tylli ki mashin ot jingot ba shongdor kumba T. 17,000.
Kawei ka longkmie ka la ujor sha ki Pulit ba ha ka miet 12 tarik mynta u bnai ki bahaing hasem jong ka ki la ïoh bat ïa uwei u nongshong shnong na kajuh ka shnong, katba u dang pyrshang ban tuh ïa ka pisa T. 10,000 na iingsah jong ka ha Sobribari kaba hap hapoh ka Hallidayganj Police Station, West Garo Hills District.
U Nengjan Arengh u la ujor sha ki Pulit ban pyntip ba ha ka 12 tarik mynta u bnai ha ka por kumba 1.30 baje mynstep, ki runar ki bym lah ban ithuh kiba wan da kawei ka kali Maruti Swift ki la kit tuh lai tylli ki masi na ka sem jong u ha ka shnong Chelipara, South West Garo Hills.
