Shillong, ïaïong, 14: Ka Sorkar Meghalaya ka la ïoh pdiang ar tylli ki khusnam bakyrpang na ka Unique Identification Authority of India ha ka Aadhaar Samvaad 2025 kaba la long ha 8 tarik, Ïaiong, 2025 ha Bharat Mandapam Convention Centre, New Delhi.
Ka khusnam banyngkong ka long halor ka Mandatory Biometric Updates na ka bynta ki heprit bad ka khusnam kaba ar ka long na ka bynta ka Best Performing State in Verification of Adult Aadhaar Enrolment.
U kyrwoh ba la phah da u Deputy Secretary jong ka tnat General Administration Department (B) ka Sorkar Meghalaya u la pyntip ba kine ki khusnam ki long kum ka sakhi halor ka jingtrei borbah ban pynthikna ïa ka jingpynïasoh ïa u Aadhaar na ka bynta ki heprit bad kiba la heh la san ha ka jylla Meghalaya baroh kawei.
Ïa kine ki khusnam la pdiang sngewbha ha ka kyrteng jong ka jylla Meghalaya da u Nodal Officer (Aadhaar), General Administration Department ka Sorkar Meghalaya u Bah Shai Kupar War.
Na ka liang jong u Commissioner & Secretary ka Sorkar Meghalaya bad uba long ruh u State Nodal Officer for Aadhaar u Dr Joram Beda u la pynpaw ïa ka jingsngewhun bad ka jingai khublei ïa baroh na ka bynta kane ka jingjop.
“Kane ka jingïoh jingithuh ka phalang ïa ka jingkut jingmut bad ka jingaiti lut jong ka kynhun naduh ki nongtrei kiba don ha madan haduh ki ophisar kiba don ha ki District, kynthup ruh ïa ki Technical Staff. Nga ai khulei ruh ïa iwei pa iwei kiba la noh synniang na ka bynta ka jingjop kaba khraw.
“Ka General Administration Department kan ïai kut jingmut ban ïatreilang ryngkat ryngkat bad ka UIDAI kynthup ruh bad ki tnat treikam bapher bapher ban pynjanai shuh shuh ïa ka jingpynïoh ïa u Aadhaar ha Meghalaya, khnang ban pynthikna ba ki nongshnong kin ïoh don ïa ka jingpynshisha bad ba kin ïoh ïa ki jingmyntoi na ki skhim jong ka Sorkar,’ u la ong.
