Shillong, Nailar, 14: Ka Ophisar bad u langrut jong ka Meghalaya Civil Defence & Home Guards Department kin sa shah pynkup burom da ka Meritorious Service Medal (MSM) ha ka jingrakhe ïa ka sngi laitluid jong ka ri India kaba la kynjoh mynta sha ka jingïaid lynti kaba 79 snem.
Katkum ka jingtip ba la ïohpdiang na ka Ministry of Home Affairs, ka Sorkar India, ka Divisional Commandant jong ka tnat Home Guards, Shillong Home Guards Division ka Kong Badalyne Kharkongor bad u Naik Parsing Ch. Marak na ka Central Training Institute of Civil Defence & Home Guards ki la shah jied ban ïoh pdiang ïa ka Meritorious Service Medal na ka tnat Civil Defence & Home Guards jong ka jylla, la pyntip u kyrwoh ba la phah da u Senior Staff Officer & Addl. PRO ka Directorate of Civil Defence & Home Guards u Bah PH Shylla.
Kum ban shu pyntip ba katkum ka Notification Nos. 88-Pres/2023, 89-Pres/2023, 90-Pres/2023 bad 91-Pres/2023 dated 14.10.2023 na ka Secretariat jong ka President, ïa ki takma shakri bad takma kam shlur jong ki saw tylli ki kynun kata ka tnat Pulit, tnat Pynlip Ding, Home Guard & Civil Defense bad Correctional Service la pynïasoh lang ha ki saw tylli ki takma ba kyrpang kaba mut ba ïa kajuh ka Service ne Galanty Medal yn ai sha ki ophisar bad ki langrut na ki saw tylli ki kynhun.
Ha ka jingpynbna jong ka President ka la pynduh noh ïa ki takma ba kyrpang jong ki kynhun.
