Shillong, Risaw, 05: Ka long ka jingsngew sarong ïa ka jylla Meghalaya ban ïoh ïa ka khubor ba u Myllung, u nongthoh Novel bad u nongthoh drama u Bah Kynpham Sing Nongkynrih u la jop ïa National Award ka khusnam Shakti Bhatt Literary Prize jong ka Shakti Bhatt Foundation, Bengaluru.
U Bah Kynpham u la ïoh ïa kane ka khusnam dei hadien ba la bishar bniah ïa ki jingnoh synñiang kiba kongsan jong u sha u sup u thiar jong ka thoh ka tar jong ka ri India (significant contributions to the literature of India) kaba kynthup ïa ki 34 tylli ki kot ha ka ktien Khasi bad ha ka ktien Phareng.
Kine ki kot ki kynthup ïa ki 10 tylli ki kot poitri ha ka Khasi bad ka ktien Phareng, 4 tylli ki kot drama, 4 tylli ki kot jingïathuh khana lyngkot ha ka Khasi bad Phareng, 2 tylli ki novel ha ka Phareng, kiba kynthup ïa ka Funeral Nights—‘kawei na ki Epic Novel ka juk mynta ba bha tam ha ka ri India’—4 tylli ki thup poitri bad jingïathuh khana (national anthologies) ba u la pynbit pynbiang (edit), kiwei de ki kot pule ha ka Khasi bad Phareng bad katto katne ki kot kiba u la pynkylla ktien sha ka Khasi.
Kum ban shu batai hangne ba ka Novel bathymmai jong u ha ka ktien Phareng kaba u la jer kyrteng “The Distaste of the Earth” ka la rung sha ka Longlist jong ka JCB Prize, kaba dei ka khusnam ba heh tam ha ri India. Ka Longlist ka dei ka thup ba shiphew tylli ki kot novel ba bha tam ha ka ri ha u snem 2024. Kane ka khusnam ka dang ïaid shakhmat mynta.
U Bah Kynpham u la ïoh ïa ka khusnam Shakti Bhatt Literary Prize ha ryngkat ka song pisa kaba 2 lak tyngka. Kane ka dei ka khusnam kaba la sdang ban sam naduh u snem 2007 ban pynsah kynmaw ïa ka nongthoh kot bad ka Editor ba pawnam, ka Shakti Bhatt, bad kane ka khusnam kaba ki sam mynta ka dei ka sien kaba khatsan.
Kum ban shu pynkynmaw hangne, u Bah Kynpham u la ïoh bun tylli ki khusnam namar ka jingshemphang jong u ha ka thoh ka tar.
U la ïoh ïa ka Northeast Poetry Award ha u snem 2004 (na Tripura), ka Veer Shankar Shah Raghunath Shah National Award ha u snem 2008 na ka Sorkar Madhya Pradesh, ka Tagore Fellowship ha u snem 2018 na ka Indian Institute of Advanced Studies, Shimla, ka Bangalore Review June Jazz Award ha u snem 2021 bad ka Sparrow Literary Award ha u snem 2022 na ka Sound and Picture Archives of Research on Women, Mumbai.
U Bah Kynpham u dei u nonghikai ha ka English Department, North-Eastern Hill University (NEHU), Shillong.
