Shillong, Lber, 4: Hapdeng ka jingiaid lynti kaba jwat, ka JETS 24×7 kaba long ka Bike Taxi Aggregator kaba nyngkong eh ha kane ka Jylla Meghalaya khatduh iawai ka la ioh ia ka Permit na ka sorkar jylla lyngba ka ophis u District Transport Officer ka East Khasi Hills District ban pynsdang noh ia ka jingkamai da ki thuk thuk ar shaka ban pynsuk ia ki nongleit nongwan ha kum kane ka juk iabeh por bad ka juk bunkam ki paidbah.
Ia ka JETS 24×7 kaba ai jingshakri lyngba ki thuk thuk ar shaka da kaba ki paidbah nongleit jingleit ki lah ban pyndonkam ïa u mobile app kaba la khlieh da u Samla Pynskhemlang W. Uriah kum u Managing Director la pyllait paidbah da ka Editor jong ka Kotkhubor Shillong Times ha ka 19 tarik u Nailar, 2023 ha Shillong Press Club.
U Samla Pynskhemlang W Uriah ha ka jingiakren bad ka Batesi TV u la iathuh ba ka JETS 24×7 ka la ioh ia ka permit na ka Sokar ha ka 1 tarik u Lber, 2024 bad mynta kum ka kynhun kaba ai jingshakri ia ki paidbah ka la lah ban pyntyllun shakhmat ia ki jingshakri ia ki paidbah ha ka leit ka wan bad ka rah ka rong ha kylleng ka nongbah Shillong.
“Ki paidbah mynta ki lah ban shaniah ia ka JETS 24×7 namar ngi la don ia ka laisen bad ka Permit ban pyntyllun shakhmat ia ka jingshakri,” ong u Samla Uriah.
Ha kaba iadei bad ka jingshngain jong ki paidbah nongleit nongwan, u samla Uriah u la ong, “ngi ladep ban pynbiang lut nadong shanong bad ki nongniah thuk thuk kiba rejister kyrteng bad ngi ki hap ban pynbiang ia ki kot ki sla kali, ka Police Verification bad kiwei kiwei ki jingdonkam,” bad bynrap ruh ba ka JETS 24×7 ka don ruh ia ka App kaba ki paidbah ki lah ban peit haba ki donkam ia ki Riders jong ngi ha ka khep ba ki donkam.”
U la iathuh ba ka JETS 24×7 ia mynta ka don ia ka pynieng ia ki thuk thuk ha Jaiaw Lan Sona Lane bad ka dang pyrshang ruh ban ioh ia ki jaka ieng ki thuk thuk ha Nongthymmai, Laitumkhrah, ha NEIGRIHMS bad ha ki jaka iew.
Haba kylli u la iathuh ba ia ka dor ka mur la buh dor hi da ka sorkar.
“Nga kyrpad ia ki paralok Riders khlem Permit ba kin wan register bad ngi bad ba kin iaid lynti kaba dei khnang ba kan long beit da ka lynti jong ka ain ba kin suk hi ialade hadien habud,” la kyrpad u Managing Director ka JETS 24×7.
