Shillong, Naiwieng, 02: Ka samla Mathrika Choudhury ka la ïoh phong ïa ka pansngiat lahduh napdeng ki 19 ngut ki nongïakhun ha ka rynsan ïakob Miss Shillong 2025 ba la pynlong da ka Fashion Society Shillong, ha U Soso Tham Auditorium ha ka sngi Saitjaiñ.
Da kane ka jingjop ka la ïohrah sha la iing ïa ka nam Miss Shillong 2025 ryngkat bad ka khusnam pisa kaba 1 lak tyngka.
Ha kane ka rynsan ïakob, ka samla Wandaphi Kharbamon kaba la jop ïa ka kyrdan First Runner-Up ka la ïoh khur ïa ka khusnam da ka song pisa kaba T. 75,000 hajar, katba ka samla Jollyne Ancie Lyngdoh kaba la jop ïa ka kyrdan Second Runner Up ka la ïoh khur ïa ka khusnam da ka song pisa kaba T. 50,000 hajar. Nalor kata, ka samla Nimrat Ranhotra ka la ïoh ïa ka kyrdan Third Runner-up bad ka samla Rimika Shylla ka la ïoh ïa ka kyrdan Fourth Runner-up.
Ha kane ka janmiet, la sam ruh ïa ki khusnam kyrpang ba kynthup ïa ka khusnam Miss Talented ba la ïoh rah da ka samla Wandaphi Kharbamon, ka khusnam Miss Alluring Smile ba la ïohrah da ka samla Niha Hajong, ka khusnam Miss Sparkling Eyes ba la ïohrah da ka samla Isadelia Bareh, ka khusnam Best Recycle Outfit ba la ïoh rah da ka samla Bashika Warlaitthma, ka khusnam Miss Tantalising Tresses ba la ïohrah da ka samla Elizabeth Lyngdoh bad ka khusnam Miss Silky Skin ba la ïohrah da ka samla Agnes Lyngdoh.
La sakhi lang ha kane ka sngi da u MLA ka West Shillong Constituency u Bah Paul Lyngdoh, u Principal Secretary ka sorkar Jylla u Bah Frederick R. Kharkongor bad u Bah Adlous Mawlong.
