Shillong, Jymmang, 11: Ki Pulit jong ka East Delhi ryngkat ka jingsynran lang jong ki dkhot jong ka Khasi Students Union (KSU) Delhi Unit ha ka step sngi U Blei ki la ïoh ban pyllait im ïa kawei ka samla Khasi kaba la don 22 snem ka rta kaba dei na ka shnong Lad Rymbai, East Jaiñtia Hills District kaba la shah set jubor ha iing sah jong uwei u samla kata ha Hasanpur, East Delhi.
Katkum u kyrwoh ba la phah da ka KSU sha ki lad pathai khubor ha ka sngi u Blei, ka la pyntip ba ha ka por 11:30 baje janmiet sngi Saitjaiñ, ki nongïalam jong ka KSU Delhi Unit ki la ïoh ïa kawei jingkyrpad ban ïarap ïa kawei ka samla Khasi kaba la shah set jubor ha ka iingsah u samla jong ka kaba don ha Hasanpur, East Delhi bad la ïoh jingtip ruh ba ka la shah shoh bad shah jrong kti ha u bar jylla ha kane hi ka miet.
Ki dkhot jong ka KSU Delhi Unit hapoh ka jingïalam jong ka President ka samla Marbiang Khongwir bad u Vice President samla Donbok Pohrmen marmar ki la leit pan jingïrap na ki bor Pulit kiba don ha nongbah Delhi bad hadien ka jingshah kyntait na ki lai tylli ki Police Station ban ïoh ïarap na ka daw jong ka jingbym lah ban lap ïa ka ïngsah jong u shynrang, ki dkhot ka KSU ki la ïoh ïa ka jingïarap lyngba ka Madhuvihar Police Station ban wad dien ïa ka ingsah lyngba ki kor Technology.
Lyngba ka jingtohkit kaba bniah, ki Pulit ki la lap ïa ka jaka sah ha kaba ki la leit ban khynra ïa ka ingsah ha ka por 5:00 baje mynstep sngi u Blei.
Ïa ka samla Khasi bad u bar jylla ki Pulit ki la rah noh sha Maduvihar Police Station ban pynlong ïa ka jingtohkit.
Hadien ba ki Pulit ki ladep tohkit ïa ka samla Khasi ki la ïalam ban sha hospital ban phah leh sa ïa ka medical checkup ryngkat ka jingsynran da ki dkhot ka KSU bad ki Pulit.
Ïa ka samla Khasi la pyllait hadien ba kam shym la treh satia ban ujor ejahar pyrshah ïa u samla jong ka uba na Hasanpur, East Delhi.
Ka seng, ka ai khublei ïa ki Pulit ka Delhi bad ka Special Police Unit for North East Region (SPUNER) kiba la ai jingïarap bad kumjuh ruh ïa ka Madhuvihar Police Station kaba la kloi ban ai jingïarap ban pyllait ïa ka samla.
