Shillong, Lber, 04: U Myntri Rangbah ka jylla Conrad Kongkal Sangma ha ka sngi Baar ryngkat ka jingïadon lang u Myntri ka Sorkar Jylla uba khhmih ïa ka tnad Bording Abu Tahel Mondal u la pynbna paidbah ba la pyntreikam ïa ka One Time Settlement (OTS) Scheme lyngba ka Meghalaya Power Distribution Corporation Limited (MePDCS).
Ha ka jingïalang ba la pynïaid da u Chairman-cum-Managing Director jong ka Meghalaya Power Distribution Corporation Limited (MePDCL) Sanjay Goyal la ïadon ryngkat ruh ki heh ophisar jong ka tnad Bording ka jylla.
Lyngba kane ka OTS Scheme, ki nongshong shnong ka jylla ki bym lah shuh ban siew ïa ka bai thang bording da ki bun bun bnai bad kiba la shah ot noh ka bording mynta ki la lah ban siew dep ïa ka ram khyndiat pa khyndiat da kaba siew shuwa 40 na ka 100 na ka pisa kaba ki dei ban siew bad ïa ka 60 na ka 100 kaba sah ki lah ban pyndep da kaba siew khyndiat khyndiat haduh san sien bad ïa ka sut ruh yn map lut baroh.
Kum ka jingpyntreikam ïa ka OTS Scheme ha kane sngi la pynithuh ruh sha u Myntri Rangbah ka jylla ïa ki san ngut ki nongshong shnong ka nongbah Shillong kiba la ïoh ïa kane ka skhim bad la map ruh ïa ka sut lane ka kuna bad lada kheiñ lang ka sut jong kine ki san ngut kaba ki dei ban siew hynrei ïa kaba la map noh ka la kot sha ka T. 2,74,937.09 lak.
Kane ka One Time Settlement Scheme kan treikam tang haduh ka 31 tarik, Lber 2025, ha kaba ki nongshong shnong ka jylla kiba la shah ot noh ka bording ki lah ban aplai lyngba ki ophis treikam jong ka tnad Bording kiba don ha kylleng ka jylla.
Hadien ka jingïalang u Conrad Sangma ula pyllait paidbah ïa ki 6 tylli ki kali kiba la shna kyrpang na ka bynta ki nongtrei jong ka tnad Bording kiba hap ban leit shna haba don ka jingthut ka bording khamtam ban kiew ha ki Post Electrict bad mynta kin donkam shuh ban rah jingkieng hynrei kin sa pyndonkam noh da kine ki kali kiba la pyndait lang ïa ki jingkieng.
Ka jingthied ïa kine ki kali ka long tang ka jingsdang bad ha ki bnai ki ban wan yn sa thied shuh shuh na ka bynta kiwei pat ki distrik jong ka jylla.
