Shillong, Risaw 26: Ka kynhun State Disaster Response Force (SDRF) ha ka sngi Saitjaiñ ka la ïoh sei ïa ka metïap jong u rawon ba la 50 snem ka rta uba ngam jyllop ha wah Umkhen ha ka shnong Jaroit, East Khasi Hills.
Katkum u kyrwoh ba la phah da u Senior Staff Officer & Addl. PRO Directorate of Civil Defence & Home Guards, Shillong Bah P.H Shylla, la ïathuh ba une u rawon u dei uba shong basah ha Pdengshnong, Nonghali bad uba la jah ha ka jingleit khwai sha wah Umkhen.
La ong ruh ba une u rawon u dei uba la tip kyrteng kum u Bah Kellshon Shadap uba dei u kurim jong ka Kong Sibonda War.
Ka kynhun SDRF hapoh ka jingïalam jong u Sub Inspector Bah D.K Kharbhuh ka la hiar sha ka wah ha ka por 7:00 baje mynstep ban wad ïa ka met da kaba pyndonkam ïa ki tyllai bad ngam ruh shapoh ka wah.
Hadien shiteng kynta ba khwai da u sainar shiah ka kynhun ka la ïoh bat ïa ka met bad tam ïa ka napoh ka wah.
