Shillong, Naiwieng, 20: Ka kynhun Search and Rescue Team jong ka tnat Fire and Emergency Services ha ka sngi Balang ka la ïoh sei ïa kawei ka metïap jong uwei u rangbah kaba la per ha pung Umïam hajan ka quarter jong ka Inspection Bungalow.
Ha kaba nyngkong, ki Pulit ki la pyrshang ban khwai hi ïa ka met hynrei namar ka jingbym don ïa ki tiar kiba biang, u Sub Inspector Bah V. Kharkongor ka Umïam Police Station u la pan jingïarap na ka kynhun SRT.
Ïa ka met la lah ban sei ha ka por 12: 40 baje mynsngi bad la aiti noh sha ki Pulit ka Umïam Police Station na ka bynta ban pynlong ïa ka jingtohkit bad ban tip ïa ka kyrteng bad ka jaka sah jong u rangbah ba la ïap.
Halor kane ka jingjia, ki Pulit ki la suba ba une u rangbah u dei uba shah pynïap ym ba u leit noh ïap hi ha pung Umïam.
Ki Pulit ki la pyntip ba ha ka met jong une u rangbah ki don ruh ki jingdro tattoo bad uwei na ki tattoo ha ka met u dei uba la thoh da u dak “S”.
Ïa mynta ka met jong une u rangbah ka don ha jaka buh metïap ha Nongpoh Civil Hospital, Ribhoi District.
