Shillong, Lber, 24: Hadien ka jingïakhun kaba jwat, ka kynhun na ka State Disaster Response Force, ka Fire & Emergency Services, bad ki Pulit ka Ri Bhoi ki la ïoh sei ïa ka met jong u rangbah uba la noh ïap ha pung umïam ha ka Lah Sngi u Blei.
Ïa une uba la khladnoh la ithuh kyrteng kum u Pritish Deb, uba shong basah ha Laban, Kench’s Trace, Shillong bad u dei ruh u trai jong kawei ka dukan electronic kaba don ha Last Stop, Laban.
Katkum ka jingsakhi jong ki briew kiba la ïohi ïa kane ka jingjia bad na ka jingpynshisha jong ki bahaing hasem la ïathuh ba une u rangbah u la noh ïap hapoh kane ka pung hajan ka jingkieng damsite ha ka sngi U Blei ha ka por kumba 1:50 baje mynsngi.
Hadien ba la ïohsei ïa ka met, ki Pulit la pyndep ïa ka jingtohkit bad ïa ki jingdonkam katkum ki kyndon jong ka ain shwa ban aiti noh ïa ka met sha ki bahaing hasem na ka bynta ban pyndep ïa ka jinglehniam bakhatduh.
