Shillong, Nailur, 07: Ym tangba ki dei ki khun synrap hynrei ki don ruh mar katjuh bor jingstad ha ka pule ka puthi. Kine ki dei ki ar ngut ki khun synrap kynthei kiba pule Mairang Presbyterian Science College, kata, ka samla Evareenia Ranee bad ka samla Evareen Ranee.
Kine ki khun synrap ki la ïoh marks mar katjuh, kata, 666 bad ïoh rung ha ka Top 10 B.Sc, Honours ha ka Chemistry ba la pynbna result dang shen da ka skulbah North Eastern Hill University (NEHU).
Ka long kaei kaei kaba kham phylla ban tip ba kine ki ar ngut ki khun synrap ki la pas ruh ruh ïa kajuh ka Division naduh ka result Secondary School Leaving Certificate (SSLC) bad ka result Higher Secondary School Leaving Certificate (HSSLC) kata ha ka kyrdan First Division bad ïoh Distinction ruh ha ka sobjek Chemistry.
Nalor kine ki arngut shipara, kiwei pat ki samla pule jong ka Mairang Presbyterian College ki long ka samla Baphilari Kurbah kaba la ïoh rung ha ka kyrdan banyngkong eh ha ka Top 10 jong ka result B.Sc Honours ha ka Mathematics da kaba ïoh 684 marks.
Ka samla Baphilari ka la ïathuh ba ka jingpoi jong ka sha kane ka kyrdan ka long tang lyngba ki jingbatai ba la ïoh na ki Nonghikai hapoh ki saw kynroh jong ka College bad lyngba ka Tutorial Class khlem da leit tuition kumba long lem kiwei pat ki para khynnah.
Sa lai ngut kiwei pat ki samla pule jong kane ka College kiba la ïoh rung ha ka thup Top Ten ha ka result B.Sc Honours h aka Mathematics ki long ka samla Baphindari Nongsiej kaba la ïoh ïa ka kyrdan kaba lai bad ïoh 639 marks, ka samla Badashisha Lyngkhoi ha ka kyrdan kaba san kaba la ïoh 605 marks bad ka samla Ilapynjanai Warjri ha ka kyrdan kaba phra bad ïoh 595 marks.
U Head of Department jong ka Mathematics ka Mairang Presbyterian Science College u Babu F Snaitang u la pynpaw ka jingsngewkmen haduh katta katta ba haduh saw ngut ki samla pule jong ka College ki la ïoh rung ha ka thup Top Ten bad ban ïoh bat syndon ïa ka kyrdan kaba hakhlieh duh ha ka Top Ten ha ka subject Mathematics kaba baroh baroh ki ñiew ba ka dei ka subject kaba jwat.
U Principal jong ka College Babu R. Thangkhiew u la pynpaw ïa ka jingsngewkmen ba ka College kaba dang lung bad kaba dang shu plie ïa ka Honours Course ha u snem 2018 hynrei ka la paw bha bad ïoh rung ruh ka thup Top 10 ha ki result bapher bapher.
U Babu Thangkhiew u la ïathuh ruh ba kiba bun ki samla kiba pule ha kane ka College ki dei kiba ïoh tang hapoh ka 60 Percent hynrei watla katta ka Management kam ju buh kyndon ban shim tang ïa kiba ïoh marks palat 80 percent hynrei la pdiang lut kat ïa kiba angnud ban pule ha kane ka College kaba don ha Eastern West Khasi Hills District.
