Shillong, K’lyngkot, 29: Ka shnong Synnei kaba hap hapoh jong ka Mawsynram Community and Rural Development Block, East Khasi Hillls District ka dei kawei na ki shnong ba la rim tam ha kane ka thain kaba dei ruh ka shnong kaba seisoh bha ha ka rep ka riang bad ki nong shongshnong ki im kamai jakpoh ban pyndap ïa ka iing ka sem ban kyrshan skul ïa ki khun tang da ka jingmih kaba ki die ïa ki marrep kum ki soh, u kwai, u tympew, u sla tyrpad, u synsar, u soh marit bad kiwei de ki marrep bad ka iew pdeng kaba ki ju leit ban die ïa kine ki marrep ka dei ha iew Mawsynram.
Ngi la ïohlad ban ïakren bad ki katto katne ki nongshongshnong bad kumjuh ruh ïa u Sordar jong ka shnong Synnei u Bah Shanbor Syiemlieh ki la ïathuh ba kane ka shnong ha ki snem ba ladep ka la mad shibun ki jingeh namarba ka shnong ka don sha trai riat bad ha kaba ïadei bad ka kit ka bah bad ka rah ka rong ïa ki marrep ka long kaba shem jingeh shikatdei eh ïa ki nongshong shnong khamtam leilei lada haba don kiba pang ba shitom ne ki longkmie kiba armet namarba la hap ban kit da ka met briew haduh ban da poi sha surok ba lait kali.
U Sordar Shnong u la ïathuh ba kum ki nongshong shnong ki la mad ruh ïa ki jingjia basngewsih namarba ki don ki nongshong shnong kiba la khladnoh tang ha shiteng lynti na ka daw ka jingjngai ka lynti ïaid kaba ki hap ban ïaid ïa ka surok kaba jrong bad kaba kyllain.
Shuh shuh u la ong ruh ba watla ki la ïoh ïa ka surok la kham slem hynrei ki kali ki dang ïohlad ban ïaid tang ha u snem 2021 hynrei tang ha ka aiom tlang ba rang ka bneng hynrei lada dei ha ki aiom slap ki kali kim lah satia ban ïaid namarba kane ka surok ka dang dei tang ka surok khyndew kaba kyllain bad kaba jngai kumba 5 kilomitar eiei haduh ban da poi ha ka surok rong bad ha ka aiom slap ki paidbah ki hap ban shu ïaid beit da ka kjat.
Kum ki paidbah ki la kyrpad ïa ki bor sorkar ban phaikhmat lem da kaba pynïoh ïa ka surok ïaid kali kaba bha khnang ban pynsuk ïa ki ha ka leit ka wan bad ka rah ka rong.
