Shillong, Rymphang, 23: Ka long ka jingisaitmet hi khait ban sakhi ïa ka jingtah ïa ki poster Advertisemet, da kawei ka kompeni bym pat lah ban tip kyrteng, ha shilynter ka kynroh jong ka Parking Lot ka MUDA hajan ka NEIGRIHMS Hospital, Shillong.
Ïa kane la lap da u Bah Nicholas Kharnami katba u dang thmu ban leit ïakynduh ïa ki nongkitkam jong ka Dorbar Shnong Mawdiangdiang.
Da ki spah tylli ki poster Advertisement ba la thoh ha ka ktien Hindi, “SAFETY Ka Naya Naam Kya Hai? bad ha ka ktien Khasi, “Kaei ka kyrteng thymmai ka JINGSHNGAIÑ” la tah ha ka kynroh kat haduh ba ka la pynisaitmet hi khait ban peit bad nalor kata u Bah Kharnami u la ong ruh ba ym tang ba la tah pathar ïa ki poster Advertisement hynrei la bret satah ruh ha madan ïa kine ki poster advertisement.
Ha kaba ïadei bad kane, u Bah Kharnami u la kyntu ïa ka Deputy Commissioner, ïa ka Shillong Municipal Board bad ïa ka Dorbar Shnong ba ki dei ban da pyrkhing bha ïa kum kine ki jingleh ba isaitmet jong ki kompeni.
