Shillong, K’lyngkot, 03: Ka Kutumba Surakshya Parishad (KSP) ha ka sngi Saitjaiñ ka la pynpaw ïa ka jingshaniah ha ki bor synshar jong ka East Khasi Hills District bad ha ka Dorbar Shnong Mawsynram bad ong ruh ba kin sa shim ïa ka rai kham hadien ha kaba ïadei bad ka krem Mawjymbuiñ.
Ïa kane la pynpaw da u President ka KSP u Satya Ranjan Borah hadien ka jingïalang ba la khot da ka Deputy Commissioner jong ka East Khasi Hills ka Kong R.M Kurbah ha kaba la ïashim bynta lang da ki nongïalam jong ka Dorbar Shnong Mawsynram.
Haba pynbna ba ka kynrum kynram halor ka krem Mawjymbuiñ ka la kut, u Borah u la ong, “nga tharai haduh mynta ki kynrum kynram jong ka krem Mawjymbuiñ ki la kut bad ngin sa ïohi kaei ka ban jia bad ki ladep pynmih ïa ki hukum bad ngi ruh ngin ngeit ïa kata.”
“Ngi shaniah hapoh ka jingïalam jong ki bor synshar district ka jylla Meghalaya bad ngin ïai ap bad ngin sa peit ha kine ki sngi ki ban sa wan bad ngi ruh ngin shim ïa ka rai kaei kaba dei ban leh,” ong u Borah ha ka jingïakren bad ki lad pathai khubor.
U Borah u la ïathuh ba la pyntip ïa ka KSP ha ka jingïalang ba kam don satia kano kano ka jingkhang da ka Dorbar Shnong Mawsynram.
“Ïa baroh la shah. Ym shym la khang ïano ïano. Mano mano ruh ki lah ban leit baroh 395 sngi naduh ka por 9:00 baje mynstep haduh ka por 5:00 baje janmiet tangba kin hap ban bud ryntih ïa ki katto katne ki Standard Pperating Procedures (SOPs). Ki don katto katne ki SOP bad ngi ruh ngi pdiang sngewbha ïa kine ki SOP….” u la pyntip haba bynrap ba ka kynhun ka la ïoh jingkular ruh ban don ka jingpynbiang kaba kyrpang.
“Namarkata, ym shym la khang ïa ngi ban mane blei. Ka jingmane ka mut aiu ka jingmane ka mut ba ngi shong hangtei bad ngi duwai bad ïa kata lah ban leh hangno hangno ruh,” la kam u President ka KSP.
Haba kyntait ba ym shym la pynmih ïa kano kano ka jingbyrngem, u Borah u ong, “kam shym la don kano kano ka jingbyrngem na ka kynhun niam Hindu. Ki paidbah hi ki pynsngewthuh bakla. Haoid, ngi ong shaphang ka pakhang surok lada ym weng ïa ka jingkhang tangba ki ong ba ym shym la khang satia.”
Haba kylli, u la ong, “nga m lah ban ong eiei ïa mynta namarba ki bor synshar district bad ka Dorbar Shnong ki ladep pynthikna ba kam don kano kano ka jingkhang bad kin ïai plie beit baroh 365 sngi naduh ka por 9:00 baje mynstep haduh ka por 5:00 baje janmiet. Ngi don ka jingshaniah ha ki. Ngin sa peit kaei kaba kin leh bad ngin sa shim rai pat kham hadien.”
“Ka shong ha ki paidbah. Ka dei ka jinglong jong ki paidbah. Ka khubor barit jong ngi sha ki paidbah ka jylla Meghalaya, Assam bad kum ki nongshong shnong ka ri Indïa – ngi dei ki nongshong shnong ka ri India bad ngi don ïa ki hok longtrai na ka bynta ka ri. Manla ki kam ba ngi leh ki long na ka bynta ban pynkhlaiñ ïa ka jingïalong kawei bad ka shongsuk shongsaiñ,” la bynrap u Borah.
Shuh shuh, u President ka KSUP u la kyntu ïa baroh ban burom ïa ka riti synshar jong ka ri India.
“Nga kyrpad ïa iwei pa iwei, kiba dei na ka jylla Meghalaya, Assam bad ha kano kano ka bynta jong ka ri India, ki dei ban burom ïa ki riti synshar jong ka ri India. Nga ngeit ba lada ngi bat ïa ki kamram jong ngi kumba la kdew ha ka Article 51 (a) jong ka riti synshar ka ri India, kan ym don kano kano ka jingeh ha ki sngi ki ban sa wan,” u la ong.
