Shillong, Naitung, 22: U Secretary jong ka Hynniewtrep Youths Council (HYC), Central Body u Bah Isaac W. Basaïawmoit ha ka sien kaba ar u la leit shah hajir ha khmat ki Pulit jong ka Sadar Police Station ha ka Lah Sngi u Blei.
U Bah Isaac u la leit shah hajir hi tang marwei khlem kano kano ka jingsynran lang jong kiwei pat ki para nongïalam bad ki dkhot jong ka seng kumba ju ïohi ha ki por ba ladep.
Kane ka jingshah khot hajir jong une u nongïalam ka HYC ka long hadien ba ki Pulit jong ka Laitumkhrah Police Station bad ki Pulit jong ka Sadar Police Station ki la pynngat 10 tylli ki kyndon ha ki lai tylli ki Case ha kaba ïadei bad ka jingleit khynra jong ka seng ïa ki briew kiba sah beain ha Lum Survey.
Ka Laitumkhrah Police Station ka la register kawei ka case katba ka Sadar Police Station ka la register ar tylli ki case.
Ha ka jingïakren bad ki lad pathai khubor u Bah Isaac hadien ba la mih na thanat u la ong, “ka dei ka jingshah khot hajir ha ka sien kaba ar halor ka ishu lum Survey ïa kaba kum ka seng ngi la rai ban ïatreilang bad ki bor Pulit haba ki khot tohkit.”
Haba kylli, ula ong, “ngim sngew phylla shuh ïa ka jingshah khot hajir namarba la long myllen namarba ngi la leh ïa kaba bha bad ngim shym la leh ïa kaba sniew bad ka jingshah khot hi ka dei khamtam eh halor (ka jingïakhun pyrshah) ïa u drok bad haduh mynta ngin dang ïaleh, ngin dang ïai kthong hi ban pynduhjait na ka liang jong ka seng.”
U la ïathuh ruh halor ka ishu Lum Survey ka seng kan dang ïai buddien.
