Shillong, Naitung, 12: Ka Myntri Kam pla tyngka bad Kam Kompeni jong ka Sorkar Pdeng ka Nirmala Sitharaman, ha ka sngi Saitjaiñ ka la leit jngoh ia ka jingkieng jri kaba pawnam ha ka shnong Siej kaba hap ha East Khasi Hills District.Ka Myntri ka la ïakren bad ki rangbah jong ka shnong, ki nongïalam shnong, bad ki nongïoh jingmyntoi na ka prokram Payment for Ecosystem Services, ka sienjam ba la kyrshan da ka World Bank, KFW bad ka ADB, ban sngewthuh kumno ki jaidbynriew riewlum ki pynneh pynsah bad pynthymmai ïa ki rukom treikam ba la rim bha ki bym ktah ia ka mariang.
Ha ka jingai jingkren jong ka sha ki nongshong shnong, ka Sitharaman ka la pynpaw ka jingsngewnguh kaba khraw ïa ki jingstad tynrai kiba la pynneh pynsah pateng la pateng ha ka jylla Meghalaya.
“Nga ai khublei ïa ka shnong baroh kawei kaba la bat ïa ka jingngeit ban im ha kane ka mariang kaba jyrngam bha. La palat shispah snem, phi la pynneh pynsah ïa ka kolshor kaba burom ïa ka mariang bad kyntiew ïa ka jingïaid lynti kaba neh – wat ban wad ki lad ki lynti ban pynïasoh sha shiliang ki wah khlem da pynkheiñ ïa ki dieng kiba im,” ka la ong.
Haba pynpaw ïa ka jinglong kyrpang jong ki jingkieng jri, ka la ong, “Ha ka por ba ka pyrthei ka wad ïa ki lad ki lynti kiba lah ban iaineh, ki briew jong ka shnong Siej ki la pyni ïa kaei kaba lah ban long lyngba ki rukom treikam kiba suk, kiba ïadei bad ka mariang. Phi la shem ïa ka lad ban im, ban ïaid, bad ban roi khlem da pynsniew ïa ki sawdong sawkun jong phi. Ka long kaba phylla kumno ki rukom pynbeit jong ki trai ri trai muluk ki lah ban long kum ki nuksa ha ka pyrthei.”
Ka Sitharaman ka la ai khublei ruh ïa ki jingpyrshang ba dang ïaid shakhmat ba la ïalam da ki nongshong shnong ban buh jingthoh bad ioh ïa ka kyrdan UNESCO heritage na ka bynta ki jingkieng jri.
“Ka jingithuh kam dei na ka bynta ban pyni, hynrei ban pyni sha ka pyrthei ba phi la leh nyngkong. Ki rukom treikam jong phi kim dei tang kiba treikam-ki long kiba lah ban pynbud. Ka jingithuh ha ka pyrthei kan iarap ban pynshlur ia kiwei pat.”
Ka la ïaroh ïa ka jingaiti ia ki pateng ïa kane ka bynta jong ka kolshor bad ka la pyni ia ka jingburom jong ka ïa ki rangbah jong ka shnong kiba la pynneh pynsah ïa kane ka rukom ha ki phew snem.
“Kane ka dei ka nuksa jong ka jingim bad ka mariang bad ban leh ïa kaba bha tam. Nga sngew ba nga long kaba la kyrkhu shisha ban ïakynduh ïa kine ki briew, khamtam eh ïa u rangbah uba la kyntiew ïa kane ka jingkieng jri. Ka dak jong ka jingpynrung ïa ka jingpynkhlain sha ki tynrai kam shym la long tang kaba shimet-ka la long kaba ai mynsiem.”
Ka Myntri kam Pla Tyngka ka la kren ruh shaphang kumno ka jingïatylli kaba jylliew jong ka imlang sahlang bad ka mariang ka pynpaw pyrthei ïa ka jingthmu jong u Myntri Rangbahduh Narendra Modi, uba la ïai bteng ban ïakhun ïa ka rukom im kaba pyrkhat ïa ka mariang. “U Myntri Rangbah duh u ju kyntu ïa ngi ban pdiang ïa ka rukom im kaba ïahap bad ka mariang. Ki jingkieng jri jong ka Jylla Meghalaya ki long ki sakhi ba im ba kum kane ka jingïohi jngai la dep pynurlong da ki trai ri trai muluk jong ngi,” ka la bynrap.
Ka jingleit jngoh ka ban jur ïa ka jingkut jingmut jong ka Sorkar India ban kyrshan ïa ki lad ki lynti kiba pynshong nongrim ha ka mariang, ka jingpynneh pynsah ba la ïalam da ki paidbah, bad ka jingithuh ïa ka jingtip tynrai jong ka India shaphang ka mariang ha ki rynsan kylleng ka pyrthei.
