Shillong, Naitung, 28: Uwei u Rangbah briew uba la tip kyrteng kum u Bah EB Nongshli, 47 snem ka rta na ka shnong Umtasor Mawdkhar, Ribhoi District u la hab kynsan katba u dang shongkai hajrong jingkieng bad la ki paralok ha Wah Ïewsier.
Namar ka jingheh jong ka um, ïa u Bah Nongshli ym shym la lap satia watla ki paralok bad ki paidbah ki la trei shitom ban wad ïa ka met jong u.
Katkum ka jingïathuh jong ki paralok jong u Bah Nongshli, kane ka la jia ha ka sngi U Blei ha ka por kumba 6:15 baje janmiet katba u Bah Nongshli u dang ïa shong kai bad ha ki paralok hajrong ka jingkieng hadien ba la wan phai na lyngkha.
U Rangbah Shnong jong ka shnong Umtasor Mawdkhat Bah R. Mukhim u la ïathuh ba kane ka la jia ha ka por janmiet bad tang shu ïoh jingtip halor kane u la pyntip mar mar sha ki Pulit ka Nongpoh Police Station ban ai jingïarap.
U la ïathuh ba na ka liang jong ka shnong ka la pyrshang ban wad ha ki bynta jong ka wah baroh shimet hynrei kim shym la lap satia ïa u Bah Nongshli wat hadien ba ki la bteng ban wad haduh ka Lah Sngi u Blei.
Ka Kong Phyrnai Nongshli kaba dei ka para arkmie jong u Bah Nongshli ka la ïathuh ba u hymmen jong ka, u la mih dang step na la iing da ka jingthmu ban leit peit ïa ka lyngkha hynrei ynda la miet ki ïoh pynban ïa ka khubor basngewsih.
Kat haduh ba la pynmih ïa kane ka khubor, ym pat lapdien satia ïa ka met jong u Bah Nongshli.
