Shillong, Jymmang, 20: U State Working President ka National People’s Party (NPP) u Marcuise N. Marak uba long ruh Myntri ka Sorkar Jylla ha ka sngi Baar u la ong ba ki seng saiñpyrthei ha rilum Garo mynta ki la hap ban ïaksaid ban pynim biang ïa la ka party hadien ba bun na ki dkhot jong ka party Congress ki la pynïasoh lut sha ka NPP.
U la kam ruh ba ki nongïalam jong ka All India Trinamool Congress bad ki nongtrei ka party ha ka jylla ki don hapdeng ka jingkulmar jingmut ïa ka lawei jong ka party bad ka Voice of the People Party (VPP) kam lah satia ban pynïar tnat sha rilum Garo.
Ha ka jingshisha, ka Congress ka dei ka party kaba la rim bha ha ka ri bad ha rilum Garo, ki dang ïaksaid mynta namarba ki nongtrei ki la shah rong lut sha ka NPP bad watla ha ka elekshon MP ba ladep ki ïoh ïa ka jingjiop hynrei kata kam mut pat ba ki dang lah ban bat ïa ka rilum Garo,” ong u Marak ha ka jingïakren bad ki lad pathai khubor.
Ha kaba ïadei bad ka TMC, u nongïalam jong ka NPP u la ong ba bun na ki dkhot jong ka TMC ki don hapdeng ka jingkulmar la kin dang ïai neh neem ha ka TMC.
“Katto katne na ki nongïalam jong ki, ki don hapdeng ka jingartatien la kin dang ïai neh neem ha ka TMC. Ngi la ïoh jingtip ïa kane na ki briew jong ki hi. Nga ong ba ki don hapdeng ka jingkulmar jingmut la kin dang ïai neh neem ha ka TMC namarba ka long kaba eh ïa ki paidbah ban pdiang ïa ka TMC ha rilum Garo,” u la bynrap.
Haba kyntait ban kynthoh eiei lada jia ba ki nongïalam ka TMC, kata u Mukul Sangma bad u Bah Charles Pyngrope kin mih noh na ka party, u Marak u la ong, “’ki dei kiba la kham shwa ban ïa nga. Phi lah ban kylli na ki ïa kane ka jingkylli. Ngam don eiei ban kynthoh halor kata.”
Ha kaba ïadei bad ka jingpyrshang jong ka VPP ban shna lynti sha rilum Garo, u nongïalam jong ka NPP u la ong ba kane ka seng saiñpyrthei ba dang thymmai kam pat lah satia ban rung sha rilum Garo namarba kim pat don ïa ki nongïalam kiba biang ba ki paidbah kin pdiang.
“Namarkata, kam don satia kano kano ka jingma lane ka jingkylli ïa ka jingdon ka VPP ha rilum Garo,” u la bynrap.
