Shillong, Risaw, 16: Uwei u rangbah uba la tip kyrteng kum u Bah Nicolas Lyngkhoi, 39 snem ka rta uba sah ha ka shnong Ktiehthawiar, Mawshynrut u la shu lait thaw salit na ki tyrsim jong ka jingïap da ka jingïada jong ki nongkitkam shnong ka Lawmei, thaiñ Diengiei na ka kti ki paidbhur.
U kyrwoh ba la phah da u Superintendent of Police, East Khasi Hills Vivek Syiem, u la pyntip ba ha ka sngi Palei ha ka por kumba 8 baje mynstep, ki Pulit ki la ïoh jingtip lyngba u Rangba Shnong ka shnong Lawmei, thaiñ Diengiei ba ki paidbhur ki la thmu ban bom ïap ïa uwei u briew tang halor ka jingsuba ba u dei u menshohnoh.
Mar mar ki Ophisar bad ki Pulit na Lumdiengjri PS bad ki Pulit SOT ki la hiar sha ka shnong Lawmei ban leit shimti ïa u Bah Nicolas Lyngkhoi, hadien ba la ai jingïada da ki nongïalam shnong hapoh ka Lawmei Community Hall.
Ha ka jingtohkit, u Bah Nicolas u la ïathuh ba u trei kum u nong pomdieng ha khlaw ka thaiñ Umïam. Ha ka 15 tarik, Risaw, 2025 ha ka por kumba 9:00 mynmiet u la mih na Umïam ban leit sahmiet sha iing ki bahaiing jong u ha ka shnong Umthlong kaba don ha ka thaiñ Sohiong. Hynrei ynda poi hajan Lawmei, ula pyrkhat ban ym leit shuh sha Umthlong bad sahmiet noh ha kawei ka sem hapoh ka shnong Lawmei namarba ka jinglong jingman ka suiñbneng ruh ka khriat.
Hynrei ha ka step kaba bud, kata, ha ka 16 tarik, Risaw, 2025 ha ka por kumba 6:00 baje mynstep, u trai ka sem u la ïohi ïa u bad u la sdang ban shon ruh katto katne ki dur bad khot ruh ïa ki paramarjan.
U SP u la pyntip ïa u Bah Nicolas hadien ba la ïoh pyllait im na Community Hall la rah sha Lumdiengjri PS bad hadien kane la ïalam ban leh ïa ka medical examination ha Civil Hospital Shillong, ha kaba ka medical report ka pynpaw ba u la ngat ha ka jingmynsaw ba malu mala.
