Shillong, Jymmang, 15: Ki nongïalam jong ka Khasi Students’ Union (KSU), Delhi Unit, ha ka sngi Balang ka la ïoh ban pyllait im ïa kawei ka samla na East Jaintia Hills, Meghalaya kaba la shah die sha kawei ka ktem awria ha Delhi.
Ha u kyrwoh ba la phah sha ki lad pathai khubor, ka KSU Delhi Unit ka la pyntip ba ha ka sngi Balang ha ka por kumba 4 baje janmiet ki dkhot ka KSU Delhi Unit ki la ïoh pdiang ïa kawei ka phone call na kawei ka kynthei kaba pan jingïarap mardor.
Katkum ka jingkren jong ka, ka la ong ba ka don hapdeng ka jingsheptieng namarba ki don ki briew kiba buddien ïa ka.
Mar mar ki dkhot ka KSU ki la pyntip noh sha ki Pulit ha kaba ki la leit synran lang ïa ki Pulit sha ka jaka ba ka samla ka la telephone ïa ki.
Hadien ka jingtohkit kaba bniah, la lap ba ka samla ka la shah pynbiej ban leit sbha Delhi bad la thmu ban die ïa ka sha ka ktem awria.
Hadien kane ka jingsngewphylla, ki Pulit bad ka KSU ki la pyrshang ban wad ïa ka jaka ba ka samla ka shong, hynrei tang shu tip ïa kane ka jingjia ki briew kiba don ha katei ka jaka ki la phet krad.
Ki nongïalam ka KSU ki la ujor ruh da ka ejahar ha Police Station ba dei peit bad ïa ka samla ba la ïoh pyllait im la pynsah ha ka jaka kaba shngaiñ hapoh ka jingpeit jong ki bor jong ka aiñ.
Ki dkhot ka KSU ki la pynbit pynbiang ban ïoh phah biang ïa ka sha la iing sha East Jaiñtia Hills ynda la ïoh bor na ki Pulit.
Ka KSU Delhi Unit ka pynpaw ïa ka jingpyrshah kaba jur halor ki jingthombor ïa ki kynthei bad ka kyntu ruh ïa ki paidbah ban long kiba husiar bad pynsngew kloi sha ki bor ba dei peit lada lap ne suba don kano kano ka jingjia kaba kum kane.
Ka seng ka ai khublei kyrpang ïa ki Pulit ka Delhi kiba la kloi ban ai ka jingïatreilang halor kane ka kam.
