Indore, Jylliew, 10: San ngut ki paralok ka Sonam Raghuvanshi kiba la shah suba ba ki dei kiba donkti ban pynïap ïa u Raja Raghuvanshi ki la shah patrong ha uwei u rangbah briew katba ki Pulit ka Meghalaya ki dang ïalam ïa ki sha kad liengsuiñ Indore ha ka sngi Baar.
Ha ka video ba la saphriang ha ka social media, la ïohi ba ki Pulit ki la hap ba ïada katba uwei u rangbah briew u dang patrong ïa kiba suba donkti bad pynrung wut wut shapoh ka Kad Liengsuiñ. Kane ka video ka la pynmih ruh ïa ki jingkynthoh kiba jur bha, kaba la pynpaw ïa ka jingbitar jong ki paidbah halor kane ka kam runar kaba shyrkhei.
Ki san ngut ki suba nongleh kam bymman, kynthup ïa ka Sonam Raghuvanshi, la tian bishar ha kashari ka jylla Madhya Pradesh ha ka Lah Sngi u Blei bad ha ka sngi Baar. Ka kashari ka la aibor ban rah tohkit ïa baroh san ngut da ki Pulit ka Meghalaya.
Ryngkat bad ka Sonam, ki Pulit ki la kem ïa u Akash Rajput, Vishal Singh Chauhan, Raj Singh Kushwaha, bad u Anand Kurmi ha kaba ïadei bad ka jingshah pynïap jong u Raja Raghuvanshi. Ki Pulit ki la pynthikna ba baroh san ngut yn sa ïalam sha Shillong na ka bynta ban pynlong shuh shuh ïa ka jingtohkit kaba bniah.
U Symbud Myntri Rangbah ka Jylla Bah Prestone Tynsong ula pynthikna ba ïa kine kiba suba donkti la kem na ki bynta bapher bapher jong ka Madhya Pradesh bad na Uttar Pradesh.
“Ïa ki, yn sa wanrah sha Shillong mynta ka miet lane lashai ka sngi,” u la ong.
