Shillong, Nailar 08: Ka United Democratic Party (UDP) ka la jied ïa u CEM barim bad Nongïalam ka Liang Pyrshah ha KHADC u Bah Titosstarwell Chyne kum u Secretary General ba thymmai ka party.
Ïa kane la pynbna da u President ka UDP Bah Metbah Lyngdoh hadien ba la wai ka jingïalang jong ka Central Executive Committee (CEC) ba long ha ka sngi Thohdieng.
“Ngi la ai jingmynjur lang ïa ka kyrteng u Bah Titosstarwell Chyne kum u General Secretary ba thymmai ka seng,” u la ong.
Ha kaba ïadei bad ka jingkylli la ka CEC ka ïakren neem ïa ka jingbujli Myntri, u President ula ong ba katto katne ki nongïalam ki la rah ïa kane ka mat hynrei ka CEC kam dei satia ka rynsan ban ïakren ïa kane ka bynta. “Kumta, ngi la shimkhia ïa ka jingai jingmut jong ki ha kane ka jingïalang” ula ong.
Katba u Bah Titos ula ong, “Nga pynpaw ïa ka jingsngewnguh ïa ka CEC kaba la ibit ïa nga ban long u General Secretary ba thymmai ka seng”.
U la pynpaw ruh ba ki mat ba hakhmat eh ba un leh hadien ka jingshimti ïa ka kam GS ba thymmai ka long ban pynkhlaiñ shuh shuh ïa ka seng.
U la ong ruh ka jingkular ban pyndep ïa ki kamram ba la tynrong ha u bad pynpaw ba ka jingtrei kam jong ka party ka la shah ktah ha kine ki khyndiat bnai ba la leit hadien ka jingiehnohkam jong u General Secretary barim Bah Jemino Mawthoh.
U la pynpaw shuh shuh ïa ka jingsngewskhem ba da jingïalang ki President bad ki Secretary jong ki District bapher bapher yn lah ban nang pynkhlaiñ shuh shuh ïa ka seng. Kan don ka jingïatreilang kaba jan hapdeng ki nongmihkhmat ba la jied da u paidbah bad ka party naduh nangne shakhmat.
