Vatican, Jymmang, 08: Ka la long ka sngi kaba kmen ïa ka Balang Catholic kaba don 1.4 billion ngut ki paidriewngeit ha ka pyrthei baroh kawei kaba la ïoh ïa u Pope uba thymmai na ka ri United Stated ban long kum u nongmih bujli jong u Petrus Bakhuid.
“Ka jingsuk kan don ryngkat bad phi,” ki dei ki kyntien banyngkong eh jong u Cardinal Robert Francis Prevost, uba dei u nong America haba kren sha ki phew hajar ngut ki riewngeit jong ka Balang Catholic kiba ïalum ha St. Peter’s Square, ha Vatican ha ka ktien Latin bad Spanish khlem da pyndonkam satia ïa ka ktien English.
Ïa u Cardinal Robert Francis Prevost la jied kum u Pope ba thymmai hapoh 24 kynta ba la pynlong ïa ka jingïathep vote kaba ar sngi da ki Cardinal ha sistine chapel, Vatican kaba la sdang naduh ka 7 tarik bad kaba la bteng haduh ka 8 tarik, Jymmang, 2025.
U Cardinal Robert Francis Prevost un long ruh u nong American ba nyngkong eh ban shah jied kum u Pope ha ka histori jong ka Balang Catholic.
Hadien ba la shah jied kum u nongsharai mynsiem ba khlieh jong ka Balang Catholic, u Cardinal Robert Francis Prevost u la jied ban shim ïa ka kyrteng kum u Pope Leo XIV.
Ïa ka kyrteng jong u Cardinal Prevost la pynbna dau Cardinal Dominique Mamberti ha ka ktien Latin “Habemus Papam” (ngi la ïoh ïa u Pope) sha ki phew hajar ngut ki paidbah kiba ïalum ha St. Peter’s Square ban sngap ïa ka khubor kaba kmen.
U Cardinal Prevost, 69 snem na Chigago u la pynlut bun ka por kum u mishoneri ha Peru bad u la shah jied kum u Cardinal dang ha u snem 2023.
U Pope Leo XIV un long u Pope uba 267 hadien ka jingkhladnoh jong u Pope Pope Francis ha u bnai baladep uba long u Pope ba nyngkong eh na dewbah Latin American bad uba la ïalam ïa ka Balang tang 12 snem.
