Lada ka jingtohkit ka paw bym suidñiew ki nongtrei ïa ka kam, ngin pynshitom: DHS
Shillong, Jylliew, 06: Ka tnat ka Koit ka Khiah jong ka Sorkar Jylla ka la shimkhia halor ka jingïap ba dang shen jong kawei ka longkmie ba dang pun khun ha Maternal and Child Health Hospital, Jowai, West Jaiñtia Hills District bad maham ruh ban pynshitom da kaba tyngeh lada ka jingtohkit jong ka Magistor ka pynpaw ba ka dei na ka jingbym suidñiew ïa ka kam.
Ha ka jingïakren bad ki lad pathai khubor ha ka sngi Thohdieng, ka Director jong ka Health Service (MCH & FW) Dr. LE Kharsahnoh ka la ong, “ngi dap da ka jingsngewsih halor ka jingkhladnoh khlem dei por jong ka (L) Kong Pynchei Bareh. Namarba la ujor ïa ka ejahar bad ïa ka jingtohkit la leh ruh da ki Pulit bad ïa ka jingtohkit Majistor la peit hi da u Deputy Commissioner, West Jaiñtia Hills ki dang ïaid shakhmat, ki bor ba dei peit ka tnat ki la aiti ïa ki medical report, ki duty roster, bad ki case detail sha ka Inquiry Committee.”
“Ka jingwad bniah ïa ka daw tynrai ruh ka dang ïaid shakhmat ban lap ïa kano kano ka jingduna ha ka jingai jingshakri ne kino kino ki jingbakla ha ki rukom treikam. Lada ka jingtohkit ka pynpaw ïa kano kano ka jingbym shimkhia ne jingkitkhlieh ïa ka kamram ha ki jaka sumar yn shim ïa ki sienjam pyrshah ïa ki briew kiba donkti,” ka la maham.
Ka la bynrap, “ka tnad ka don ïa ka jingkut jingmut ba ka jingtreikam long kaba khuid, ba don jingkitkhlieh bad kaba ai jingshngaiñ ïa ki nongpang bad ngin shim ïa ki lad ki lynti ban pynbeit katkum ka jingdonkam ban pynkhlaiñ ïa ki kyndon jong ka koit ka khiah jong ki longkmie ha kylleng ki jaka ai jingsumar paidbah.”
Haba pynpaw ba kane kam dei ka khep ban teipop hynrei ka dei ka khep ban pyrkhat bad ban pynbha, ka Dr. Kharsahnoh ka la ong, “kum ka tnad ngi ïai neh skhem ha ka jingkitkhlieh ban pynthikna ba kum kine ki jingjia ba sngewsih kin ym jia shuh ha ki por ban wan.:
Ka DHS ka la ong ba ïa ka Kong Pynchei Bareh na ka shnong Jalaphet la pynkynriah sha MCH Hospital, Jowai dang mynta ka taiew hadien ba la sumar ha Sutnga CHC.
“Ka la kyntait ban leit sha hospital ha ka miet (2 tarik, Jylliew). La pdiang ïa ka ha ka 3 tarik, Jylliew ha ka por 12.45 baje mynstep bad la bishar bniah ïa ka da u doktor. La lap ba ka long kaba koit ba khiah. Ka don ïa ka jingsngewthuh pura, ka BP, ka jingring mynsiem jong ka ki long hapoh ki kyndon ba la buh.
ka jingkha khun kaba thymmai bad namar ba ym shym la don ki dak jingma kiba lah ban mih mardor, la buh ïa ka hapoh ka jingpeit bniah,” ka la ong. La sdang ïa ka jingsumar kynthup ïa ka jingai um bad ai dawai namarba kam don ha ka jingkha khunlung bad namarba ym shym la don ki dak jingma kiba lah ban jia mardor la buh shwa ïa ka hapoh ka jingpeit bniah,” ka la ong.
Ka la ong ba ha ka step 4 tarik Jylliew, ka la ong ba bishar bniah biang ïa ka da u doktor, uba la pynthikna ba ym donkam ban leh ïa ka jingsumar marmar bad la bteng ban peit thuh ïa ka jinglong jingman jong ka.
“Ha ka por kumba 6.20 baje janmiet, ka la ujor ba ka don ka jingpang kpoh bad la pynkynriah noh ïa ka sha ka High Dependency Unit ban buddien bha bad bishar bniah shuh shuh hynrei ha ka por 7.15 baje janmiet, ki bahaïing hasem jong ka nongpang ki la kyrpad ban pyllait noh ïa ka bad ban pynkynriah noh sha kawei pat ka jaka sumar. Katba u doktor u dang pynkhreh na ka bynta ban pyllait noh ïa ka na ka jaka sumar la bthah ruh ïa ki bahaing hasem ban pynbiang lypa ïa ka kali Ambulance. Ha ka por 8:00 baje mynmiet, ka jinglong jingman jong ka, ka la sdang ban sniew bad kynsan kynsan ka la duh mynsiem, kam tip briew shuh bad ka oxygen level jong ka ruh ka la hiar, ki vitals jong ka, ka blood pressure ruh ka la hiar. … mar mar la ai ïa ka jingïarap kyrkieh bad ki (doktor) la ai jingïarap kyrkieh hynrei ïa ka jinglong jong ka ym shym la lah ban pynim biang ïa ka. La pynbna ba ka la khladnoh ha ka por 9:30 baje mynmiet wat hapdeng ka jingïaleh shitom ban pynim biang ïa ka,” la pyntip ka Dr. Kharsohnoh.
