Shillong, Jylliew, 26: U Myntri ka Sorkar Jylla u Bah Paul Lyngdoh uba long ruh u nongaiktien jong ka Sorkar MDA ha ka sngi Palei u la kyntu ïa ki sengbhalang ka jylla Meghalaya ba kin kham long kiba husiar haba ki shim ïa kino kino ki mat kiba lah ban pynmih ïa ka shongsuk shongsaiñ khamtam eh kum ka ishu jingïakajia pud bad u la kyntu ruh ïa ki sengbhalang ba kim dei ban shu pynlong ïa ka Sorkar kum ka “Punching Bag”.
Haba pyntip halor ka jingjia ha ka shnong Langpangap, West Jaiñtia Hills District u Bah Paul u la ïathuh ba u Symbud Myntri Rangbah ka Jylla uba khmih ïa ka tnat Kam Pohiing u Bah Prestone Tynsong u la shimkhia ïa kane ka kam bad ka Sorkar ka la ïakren ruh bad ka Sorkar Assam ban ïa pynbeit da ka jingïasngewthuh jingmut halor kane ka jingjia.
Halor ka jingtakraiñ jong ki sengbhalang ïa ka Sorkar Jylla, u Bah Paul ula ong, “ka jingïakajia pud ka la ïaid mynta da ki phew phew snem bad ha ka jaka ba phin kynthoh ïa ka sorkar lajong kaba ki paidbah hi ki la jied, ki la dei ban ïatreilang ryngkat bad ban wad ïa ki lad ki lynti kumno ban pynneh ïa ka shongsuk shongsain.”
U la kyntu ruh ïa ki ban ym kura ïa ka Sorkar da kaba pynlong kum ka “punching bag’. “Ngi don hangne ban trei,” u la bynrap.
Ha ka sngi Balang da ki spah ngut ki paidbah na ka shnong Lapangap bad na ki shnong ba marjan ryngkat bad ki dkhot jong ki sengbhalang bapher bapher ki la leit jynrat ïa ki tynrai dieng bad ïa ka iing ba la shna da ka Karbi Anglong Autonomous Council (KAAC) ha Lapangap ïa kaba ki paid Khasi Pnar ki la kynnoh ba kane ka jingleh jong ka KAAC ka long ban kyntur pud beain sha u pud u sam jong ka Jylla Meghalaya.
Da ka jingdon jong ki Pulit ka Jylla Meghalaya bad Assam kynthup ruh ki Border Magistrate la lah ban tem ïa ka jingkynad bad la lah ban beh noh na ki paidbah bad ïa ki dkhot sengbhalang.
